Mańǵystaýda tamaqtan ýlanǵan 2 oqýshy jansaqtaý bóliminde jatyr
AQTAÝ. KAZINFORM - Resmı málimetke súıensek, búgin ýlanǵan balalardyń sany - 222 ge jetti.
Eske salaıyq, keshe 7-qyrkúıek kúni Munaıly aýdanynyń emhanasyna astan ýlanǵan 141 bala kómekke júgingen bolatyn.
Búgin Mańǵystaý oblysynyń ákimi aýrýhanaǵa túsken oqýshylardyń jaǵdaıymen tanysyp, jaýapty tulǵalarǵa ýlanǵan balalarǵa qajetti barlyq kómekti kórsetýdi jáne aýrýhanadaǵy jumys kestesin kúsheıtýdi tapsyrdy.
-Aýrýhanada tıisti em-dom kórsetilýde. Dári-dármek pen tósek oryndary jetkilikti. Dál qazir eń bastysy, oqýshylardyń densaýlyǵy. Naýqastardyń tez jazylyp ketýine barlyq jaǵdaıdy jasaýymyz qajet. Keıin osy jaǵdaıǵa baılanysty tıisti sharalar men sheshimder qabyldaıtyn bolamyz,- dedi Nurdáýlet Qılybaı.
Aýrýhanada 67 bala em qabyldaýda. Onyń ekeýi jansaqtaý bóliminde jatyr.
Oblysta ákimdik janynan qurylǵan jedel shtab jumys istep jatyr. Densaýlyq saqtaý basqarmasy tarapynan shaqyrtýlarǵa dereý qyzmet kórsetý úshin, oblystyq jedel jáne shuǵyl medıtsınalyq kómek stantsııasynyń 12 negizgi jáne 4 qosymsha brıgadasy jumyldyryldy. Oǵan Munaıly aýdandyq ortalyq aýrýhanasynyń 4-sanatty 4 brıgadasy men Aqtaý qalasynyń 4-sanatty 7 brıgadasy qosylǵan.
Mańǵystaýda ýlanǵan oqýshylardyń sany 67-ge jetkenin jazǵan bolatynbyz.
