Mańǵystaýda tabıǵı qoryqtyń 55 myń gektar jeri munaı óndirý úshin jeke kompanııaǵa berildi

AQTAÝ. KAZINFORM — Óıtkeni tabıǵı qaýmal «Tepke» ken ornymen qıylysyp jatyr. 

Mańǵystaý oblystyq tabıǵı resýrstar jáne tabıǵat paıdalanýdy retteý basqarmasynyń málimetinshe, «Manashy» memlekettik tabıǵı qoryǵynyń aýmaǵyn 55 455 gektarǵa azaıtý josparlanyp otyr.

Buǵan deıin qoryqtyń jalpy aýdany — 172 573 gektar bolǵan. Demek, ol endi shamamen tórtten birge azaıady.

— Tabıǵı qoryq aýmaǵyn azaıtý týraly sheshim «Tepke» ken ornynyń batys bóliginde kómirsýtekterdiń munaı baǵanasynyń ashylýyna baılanysty shyqqan. Kómirsýtek shıkizatyn odan ári óndirý úshin tabıǵı qoryqtyń quramynan jer alý qajettiligi týyndap otyr. Osy maqsatta ǵylymı negizdeme ázirlendi, — delingen habarlamada. 

Aıta keteıik, «Tepke» ken orny 2021 jyly ashylǵan. Bul — aımaqta sońǵy 30 jylda ashylǵan eń iri ken orny.

Ony ıgerýmen «Tepke» JShS aınalysady al, quryltaıshylary — nıderlandtyq Seballes Holdings B. V. kompanııasy men qazaqstandyq Oxygen Capital Limited jeke kompanııasy.

Buǵan deıin Kaspıı teńiziniń deńgeıi 15 santımetrge tómendeıtinin jazǵan bolatynbyz.