Mańǵystaýda sýmen jabdyqtaý júıeleri kezeń-kezeńimen jańartylady
Memleket basshysynyń tapsyrmasyna sáıkes Mańǵystaýda sý tuşytý, bý-gazdy qondyrǵylary men týrboagregattar sııaqty jabdyqtardy salý jáne jańǵyrtý boıynsha negizgi alty jobany iske asyrýdy kózdeıtin «MAEK» kásipornyn jańǵyrtý baǵdarlamasy ázirlendi. Bul týraly Ortalyq kommýnıkatsııalar qyzmetinde ótken brıfıngide Mańǵystaý oblysynyń ákimi Nurlan Noǵaev aıtty, dep habarlaıdy Kazinform.
Mańǵystaý oblysy halqynyń qarqyndy ósimi men ekonomıkalyq damýy aıasynda máselelerdiń biri — kommýnaldyq ınfraqurylymdy jańartý jáne onyń qýatyn arttyrý. Bul strategııalyq bastamalar tirshilikti qamtamasyz etý, ınjenerlik jeliler men sýmen jabdyqtaý júıesin jańǵyrtýǵa baǵyttalǵan. Nazar aýdarýdy talap etetin negizgi faktorlardyń biri – «MAEK» kásiporny. Keshenniń energetıkalyq jabdyqtary 81% tozǵan.
«Osyǵan baılanysty Memleket basshysynyń tapsyrmasy boıynsha sý tuşytý, bý-gaz qondyrǵylary jáne týrboagregattar sııaqty jabdyqtardy salý jáne jańǵyrtý boıynsha birneshe negizgi jobalardy iske asyrýdy kózdeıtin kásiporyndy jańǵyrtý baǵdarlamasy ázirlendi. Osy jyly kásiporynnyń óz qarajaty esebinen týrboagregattarǵa, qazandyq agregattaryna jáne qosalqy jabdyqtarǵa kúrdeli jóndeý júrgizilip jatyr. Mańǵystaý oblysy ákimdiginiń rezervinen tozyǵy jetken jabdyqty aýystyrýǵa 2,6 mlrd teńge bólindi. Premer-Mınıstrdiń tapsyrmasy boıynsha jańa jabdyqtar men jıyndyqtardy satyp alýǵa QR Úkimetiniń rezervinen taǵy 4,9 mlrd teńge bólindi», - dep habarlady óńir basshysy
Sonymen qatar Aqtaý qalasyndaǵy ózekti máselelerdiń biri – ınjenerlik jelilerdi qaıta jańartý. Halyqty sapaly kommýnaldyq qyzmettermen qamtamasyz etý maqsatynda 2026 jylǵa deıin Aqtaý qalasynyń 25 shaǵyn aýdanyn 5 aımaqqa bólip, jalpy uzyndyǵy 919 shaqyrymdy quraıtyn ınjenerlik jelilerdi (sý, káriz, jylý) jańǵyrtý josparlandy.
«Búgingi kúni 1-kezeń boıynsha jalpy somasy 20,4 mlrd teńge bolatyn 19 joba ázirlendi (Sý boıynsha 6 joba, káriz boıynsha 6 joba, káriz tazartý stantsııalary 6, Jylý 1 joba). Bıyl Aqtaý qalasynyń 3a, 3b jáne 1-shaǵynaýdandarynda jylý jelilerin qaıta jańartý jumystary júrgizilip jatyr (jalpy uzyndyǵy 10,2 km). Ol úshin respýblıkalyq bıýdjetten 3,3 mlrd teńge bólindi (jobanyń jalpy quny – 11,5 mlrd teńge). Sonymen qatar Aqtaý qalasynyń 31a shaǵyn aýdanynda jylý jelilerin jańartý jumystary bastaldy (uzyndyǵy – 0,7 shaqyrym, merdigerlik uıym – «Teploenergostroı» JShS, jobanyń quny – 240,0 mln teńge). Respýblıkalyq bıýdjetten 199 mln teńge bólindi. Bul nysan bıyl jeltoqsanda aıaqtalady dep kútilýde», - dedi OKQ brıfınginde Nurlan Noǵaev.
Qalǵan shaǵyn aýdandardy jańartý boıynsha jumystar kezeń-kezeńimen iske asyrylady. Infraqurylymdy jańartýdyń mańyzdy aspektisi retinde aımaqty aýyz sýmen tolyq qamtamasyz etý mańyzy aıryqsha. Jaz maýsymynda oblysta sý tapshylyǵy táýligine 77,2 myń tekshe metr bolady. Jyl saıyn sýǵa suranystyń ósimin eskere otyryp, 2025 jylǵa qaraı jalpy qýattylyǵy táýligine 136 myń tekshe metr sýdy tushytatyn alty jobany iske asyrý josparlanyp otyr.
Sonymen qatar óńirdiń ár tusynda jańa tuzsyzdandyrý zaýyttarynyń qurylysy belsendi júrgizilip jatyr. Atalǵan jobalar sý tapshylyǵyn joıýǵa yqpaldasady. «Kaspıı» sý tushytý zaýyty qýatyn táýligine 40 myń tekshe metrge jetkizýdiń 2-kezeńi boıynsha jumys jalǵasyp jatyr. 2022 jyldyń jazǵy kezeńinde táýligine 5 myń tekshe metr sýdy tushytatyn qondyrǵy paıdalanýǵa berildi. 2024 jyldyń sáýirine deıin bul jumystardy tolyq aıaqtaý josparda bar.
Sonymen qatar Aqtaý qalasynda ınvestordyń jeke qarajaty esebinen qýaty táýligine 20 000 tekshe metr sýdy tushytý zaýytyn salý jumystary júrgizilip jatyr. Jobanyń quny – 4,0 mlrd teńge. Joba kezeń-kezeńimen júzege asyrylýda. Qazirgi ýaqytta zaýyttyń belgilengen qýaty – táýligine 3600 tekshe metr. Jyl sońyna qaraı qýattylyqty 2 ese arttyryp, táýligine 7200 tekshe metrge deıin jetkizý josparlanyp otyr.
Bıyl Fort-Shevchenko qalasynda táýligine 5 myń tekshe metr (RB - 4,2 mlrd teńge) jáne Kendirli aýylynda táýligine 50 myń tekshe metr sý tushytatyn qondyrǵylardy salý jumystary bastaldy.
