Mańǵystaýda sý tasqynynan zardap shekkenderge gýmanıtarlyq kómek jınaý toqtatyldy
AQTAÝ. KAZINFORM - Mańǵystaýda turǵyndardan gýmanıtarlyq kómek jınaý toqtatyldy. Endigi resmı túrde evakýatsııalaý jarııalanǵan eldi mekenderde turǵyndarǵa arnalǵan evakýatsııalyq pýnktterde ǵana kómek kórsetiledi.
Oblystyq Qoǵamdyq kommýnıkatsııa ortalyǵynyń málimetinshe, Mańǵystaý oblystyq máslıhaty janynan qurylǵan qoǵamdyq shtabtyń sheshimimen óńirde sý tasqyny saldarynan Atyraý oblysynan evakýatsııalanǵan azamattarǵa 15 evakýatsııalyq pýnktte tósek-oryn, ystyq tamaq berý túrinde memlekettik kómek kórsetilgen bolatyn.
Mańǵystaý oblysy Іshki saıasat basqarmasynyń «Qoǵamdyq kelisim» basshysy Amankúl Jaıylhanovanyń aıtýynsha, sý tasqyny bastalǵannan bastap osy ýaqytqa deıin óńirde 20 tonnaǵa jýyq gýmanıtarlyq kómek jınalǵan. Buǵan deıin azamattarǵa gýmanıtarlyq ortalyqtarda azyq-túlik pen materıaldyq zattar taratylǵan bolatyn.
«31 naýryzynan bastap biz respýblıka boıynsha oblystyq Dostyq úılerinde shtabtar quryp, gýmanıtarlyq kómek qabyldadyq. Biz birinshi kezekte kómekti Aqtóbe men Qulsaryǵa jiberdik. Al gýmanıtarlyq kómekti qabyldaý qoımalarynda jınalǵan barlyq zatty evakýatsııalanǵan turǵyndarǵa taratamyz. Osymen gýmanıtarlyq kómek qabyldaý toqtatylady. Aldaǵy ýaqytta evakýatsııalyq pýnktter bazasynda tósek-oryn jáne ystyq tamaq berý túrinde kómek kórsetiledi», - dedi Amankúl Jaıylhanova.
Mańǵystaý oblystyq máslıhatynyń depýtaty, QHA shtabynyń tóraǵasy Irına Belıaeva sý tasqynynan zardap shekkenderge kómek kórsetken turǵyndarǵa alǵysyn jetkizdi.
«Qıyn kezeńde Mańǵystaý oblysynyń árbir turǵyny qoldaý bildirip, kómek kórsetti», - dedi Irına Belıaeva.
Esterińizge sala keteıik, buǵan deıin el Prezıdenti sý tasqynynan zardap shekken árbir otbasy Úkimettiń nazarynan tys qalmaıtynyn málimdedi.
Sondaı-aq, Atyraý oblysynyń Jylyoı aýdanynyń ortalyǵynda bolǵan sý tasqyny kezinde Mańǵystaý oblysyna 25 myńnan astam turǵyn evakýatsıalanǵan edi.
