Mańǵystaýda sport mekemesiniń bas esepshisi bıýdjetten 117 mıllıon teńge jymqyrǵan

AQTAÝ. KAZINFORM – Mańǵystaýda Ulttyq sport túrleri ortalyǵynyń bas esepshisi bıýdjet qarajatyn jymqyrǵan. Mańǵystaý oblysynyń prokýratýrasy bıýdjet qarajatynyń jumsalýynyń zańdylyǵyn tekserý barysynda atalǵan sport mekemesinde jymqyrý faktisin anyqtady.

Ulttyq sport túrleri ortalyǵynyń bas esepshisi 2018-2023 jyldar aralyǵynda 117 mln teńge kólemindegi bıýdjet qarajatyn zańsyz ıemdengen. Atalǵan derek oblys prokýratýrasymen tergelip, nátıjesimen qylmystyq is Qylmystyq kodekstiń 371-babynyń 2-bóligi (salǵyrttyq) jáne 189-baby 4-bóligimen (jymqyrý) sotqa joldanǵan.

Sot úkimimen Ulttyq sport túrleri ortalyǵynyń basshysy óz mindetterin tıisinshe oryndamaý faktisi boıynsha kináli dep tanylyp, «QR Táýelsizdiginiń otyz jyldyǵyna baılanysty raqymshylyq jasaý týraly» zańǵa sáıkes qylmystyq jazadan bosatyldy. Al mekemeniń bas esepshisi bıýdjet qarajatyn jymqyrǵany úshin 7 jyl bas bostandyǵynan aıyryldy. Sot úkimi zańdy kúshine endi.

Buǵan deıin Mańǵystaýda esirtki saqtalǵan jasyryn qoımanyń tabylǵanyn jazǵan edik.