Mańǵystaýda sottalǵan komandır kassatsııalyq shaǵym túsirdi
AQTAÝ. KAZINFORM – Mańǵystaýda merzimdi áskerı qyzmetshini óltirý isi boıynsha sottalǵan «Batys» óńirlik qolbasshylyǵy 25744 áskerı bóliminiń zenıttik-artıllerııalyq vzvodynyń burynǵy komandıri Damır Dosov kassatsııalyq shaǵym bergen. Bul týraly advokat Azamat Sagal habarlady.
Advokattyń aıtýynsha, 25744 áskerı bóliminiń zenıttik-artıllerııalyq vzvodynyń burynǵy komandıri Damır Dosov shyǵarylǵan úkimmen kelispeıdi.
- Qazirgi ýaqytta kassatsııalyq shaǵym qylmystyq ister jónindegi sottyń óndirisinde. Protsess jóninde ázirshe belgisiz, sot otyrysy taǵaıyndalǵan joq, - deıdi ol.
Qylmystyq ister jónindegi kassatsııalyq soty muny rastady. Kassatsııalyq shaǵym eks-komandırdiń advokatynyń atynan jazylǵan.
Eske salaıyq, byltyr qyrkúıek aıynda «Batys» óńirlik qolbasshylyǵy bólimsheleriniń jıyny kezinde «Oımasha» polıgonynda qarýmen jumys isteý erejeleriniń buzylýy saldarynan merzimdi áskerı qyzmetshi, 19 jastaǵy sarbaz Marat Barqulov jaraqat alyp, qaza tapqan bolatyn.
Damır Dosov - QR QK-niń 99-baby 1-bóligi boıynsha Marat Barqulovty qasaqana óltirgeni úshin 13 jylǵa bas bostandyǵynan aıryldy.
Buǵan deıin, Prezıdent áskerde qaza tapqan sarbazdarǵa qatysty isti tergeý kezinde zańnyń saqtalýyn qadaǵalaýdy tapsyrdy