Mańǵystaýda sońǵy jol ýchaskeleriniń biri jóndelip jatyr
AQTAÝ. KAZINFORM – Mańǵystaýda jóndeýdi qajet etken sońǵy iri avtojol ýchaskeleriniń biri jańartyla bastady. Fort-Shevchenko – Taýshyq – Shetpe baǵytyndaǵy 70 shaqyrymdyq joldy ortasha jóndeýge bıýdjetten 6 mlrd teńgeden astam qarjy bólingen.
«Qazavtojol» ulttyq kompanııasy oblystyq fılıaly baspasóz qyzmetiniń habarlaýynsha, joba aıasynda joldyń eski asfalt jabyny alynyp, jańa asfaltbeton qabattary tóseledi. Sonymen qatar jol jıekteri nyǵaıtylady. Qazirdiń ózinde eski jabyndyny alý jumystary 50 shaqyrymnan astam aýmaqta júrgizilgen. Joldyń tómengi qabatyna asfaltbeton tóseý jumystary da jalǵasyp jatyr. Jobany kelesi jylǵa deıin aıaqtaý josparlanǵan.
Fort-Shevchenko – Taýshyq – Shetpe jolynyń jańarýy óńirde eldimekender arasyndaǵy qatynasty jaqsartyp, jol qaýipsizdigin arttyrýǵa múmkindik beredi.
Aıta ketetin jáıt, Qazir Mańǵystaýdaǵy avtojoldardyń 95 paıyzy jaqsy jaǵdaıda. Atalǵan joba aıaqtalǵannan keıin joldar 100 paıyz jaqsy jaǵdaıǵa keltiriledi.
Buǵan deıin Mańǵystaýda aýyr júk kólikterine jazǵy shekteý engizildi.
