Mańǵystaýda saılaý komıssııasynyń jańa quramyna 7 partııanyń ókilderi kirdi
Aqtaýda VIII saılanǵan Mańǵystaý oblystyq máslıhatynyń kezekten tys VIII sessııasy ótti. Sessııa barysynda oblystyq saılaý komıssııasynyń músheleri saılandy, dep habarlaıdy Kazinform Mańǵystaý oblysy ákiminiń baspasóz qyzmetine silteme jasap.
Oblystyq saılaý komıssııasynyń quramyna jeti saıası partııanyń ókilderi kirdi.
Saılaý komıssııasynyń músheleri:
— Elýbaı Ábilov, «Aýyl» halyqtyq-demokratııalyq patrıottyq partııasynan;
— «AMANAT» partııasynan Jarmaǵanbet Aıtýarov;
— Kámshat Іzbasarova, Jalpyulttyq sotsıal-demokratııalyq partııadan;
— Gúljan Ismýrzına, Qazaqstan halyq partııasynan;
— Іzbasar Orynbekov, Respublica partııasynan;
— Sábıt Seıdalıev, «Aq jol» demokratııalyq partııasynan;
— Naýryz Ahaev, «Baıtaq» partııasynan.
Búkil kandıdattar saılaý týraly zańda kózdelgen arnaıy rásimderden sátti ótti.
Saýaldar quqyqtyq statıstıka jáne arnaıy esepke alý komıtetiniń Mańǵystaý oblysy boıynsha departamentine, sondaı-aq oblystyń polıtsııa departamentine joldanyp, oń qorytyndy alyndy.
Máslıhat depýtattary saılaý komıssııasynyń quramyna kandıdattardy biraýyzdan qoldap, bekitti.
— Búgingi sessııanyń qurmetti qatysýshylary, Mańǵystaý oblysynyń áleýmettik-ekonomıkalyq damýy úshin mańyzdy sharalardy qabyldaý sheńberinde azamattar saılaǵan ókil depýtattar baǵa jetpes ról atqarady. Prezıdent Qasym-Jomart Toqaev usynǵan azamattyq qoǵamdy nyǵaıtýǵa jáne halyqty sheshimder qabyldaýǵa belsendi qosýǵa baǵyttalǵan bastamalar qazirgi ýaqytta tabysty iske asyp jatyr, — dep atap ótti Nurlan Noǵaev.
