Mańǵystaýda «Sátti sársenbi» tazalyq aktsııasy bastaldy
AQTAÝ. KAZINFORM – Búgin Memleket basshysynyń tapsyrmasyna sáıkes Aqtaýdaǵy jaǵajaılardy qoqystan tazartý sharasy uıymdastyryldy. Tańǵy senbilikke oblys ákimi N.Qılybaı, QR ekologııa jáne tabıǵı resýrstar vıtse-mınıstri M.Oshýrbaev pen «Jasyl el» eńbek jasaǵy jáne qala turǵyndary qatysty. Bul týraly oblys ákiminiń baspasóz qyzmeti málimdedi.
Qala irgesindegi jaǵajaılar — jazda halyq kóp jınalatyn oryn. Munda kún saıyn 10 myńǵa jýyq adam Kaspııdiń móldir sýyna túsip, demalady. Sáıkesinshe, jaǵalaýda túrli qoqys pen polıetılen, plastık qutylar kóptep kezdesedi.
Jaǵajaılarda senbilik uıymdastyrý bastamasyn óńir turǵyndary qýana qabyldady.
«Tazalyq sharasyna qatysýshylar ala tańnan bastap birneshe shaqyrymǵa sozylyp jatqan teńiz jaǵalaýyn qoqystan tazartyp, júzdegen qapshyqty kúl-qoqysqa toltyrdy. Sonymen qatar jaǵajaılardy abattandyrý jumystary júrgizildi», - delingen habarlamada.
Oblys ákimi Nurdáýlet Igilikuly óńir turǵyndary men jastardy tabıǵatqa beı-jaı qaramaı, tazalyq jumystaryna uıytqy bolýǵa shaqyrdy.
Kaspıı jaǵalaýynda bastaý alǵan aktsııa ár sársenbi saıyn turaqty túrde ótkiziledi. Búgin aqtaýlyq belsendi jastar bul chellendjdi jańaózendikterge joldady. Kelesi sársenbide tazartý jumystary «Kendirli» demalys aımaǵynda jalǵasady.
