Mańǵystaýda Rım dáýirimen baılanysty kóne qala tabyldy
AQTAÝ. KAZINFORM — Mańǵystaýda dala órkenıetiniń kóne izi – eki myńjyldyq qala zerttelip jatyr. Túpqaraǵan aýdanyndaǵy Qaraqabaq qalashyǵynda arheologııalyq zertteý jumystary jalǵasyp jatyr. Ǵalymdar bul nysandy b.z. I–VI ǵasyrǵa jatatyn kóne saýda jáne qolóner ortalyǵy dep baǵalap otyr.
Arheologııalyq zertteýler atalǵan óńir arqyly osydan 2000 jyl buryn halyqaralyq saýda qatynastary júrgenin dáleldeıdi. Mamandardyń pikirinshe, Qaraqabaq Uly Jibek jolynyń soltústik tarmaǵyndaǵy mańyzdy teńiz-qurlyq saýda toraby bolǵan. Ol Kaspıı mańy memleketteriniń saıası, ekonomıkalyq jáne saýda baılanystarynda erekshe ról atqarǵan.
Qalashyqtan Vızantııa, Úndistan, Rım, Parsy jáne Qytaı elderimen baılanysty dáleldeıtin tıyndar, mórler, qysh ydystar men túrli jádigerler tabylǵan. Sonymen qatar arheologtar kóne porttyń izderin, qolóner óndirisi men teńiz saýdasyna qatysty kóptegen derekterdi anyqtaǵan.
Ǵalymdardyń paıymdaýynsha, Qaraqabaq ІІ ǵasyrdaǵy Rım ǵalymy Klavdıı Ptolemeı jasaǵan Kaspıı teńiziniń shyǵys jaǵalaýy kartasynda Aspabota atty qala-memleket retinde kórsetilýi múmkin. Zertteýshilerdiń aıtýynsha, bul qala óz dáýirindegi iri logıstıkalyq jáne saýda ortalyqtarynyń biri bolǵan.
Mamandar bul jańalyqtar Mańǵystaýdyń kóne órkenıetter men halyqaralyq saýda qatynastaryndaǵy mańyzdy ornyn aıqyndaı túsetinin atap ótti.
Aıta keteıik, Qazaqstanda arheologııalyq jumystarǵa 5 jyldyq lıtsenzııa engiziledi.
