Mańǵystaýda respýblıkalyq mańyzy bar joldyń 70 shaqyrymynda jóndeý jumystary júrgizilip jatyr
ASTANA. KAZINFORM – Mańǵystaý oblysynda respýblıkalyq mańyzy bar «Fort-Shevchenko – Taýshyq – Shetpe» avtomobıl jolynda ortasha jóndeý jumystary jalǵasýda, dep habarlaıdy «QazAvtoJol» ulttyq kompanııasy.
Jóndeý jumystary avtojoldyń 91-161 shaqyrym aralyǵynda júrgizilip jatyr.
Jobaǵa 22 birlik jol-qurylys tehnıkasy men 38 maman jumyldyrylǵan.
– Bıyl 36 shaqyrymda joný jumystary júrgizildi, 875 tekshe metr aýmaqta jol tósemindegi aqaýlar joıyldy. Sonymen qatar 35 shaqyrymda iri túıirshikti asfaltbetonnan tómengi qabat tóseldi, – delingen habarlamada.
Ortasha jóndeý jumystary jol sapasyn jaqsartýǵa, kólik qozǵalysynyń qaýipsizdigi men turǵyndardyń jaılylyǵyn arttyrýǵa múmkindik beredi.
Aıta keteıik, Qaraǵandy oblysynda respýblıkalyq mańyzy bar joldyń 32 shaqyrymy jóndelip jatyr.
