Mańǵystaýda Respýblıka kúnine oraı 50-den astam is-shara ótedi
Mańǵystaýda Respýblıka kúnin joǵary deńgeıde atap ótý maqsatynda óńirlik is-sharalar jospary bekitilip, qarqyndy jumystar júrgizilip jatyr. Josparǵa sáıkes oblys kóleminde respýblıkalyq jáne óńirlik mańyzdy 50-den astam is-shara josparlanǵan. Bul týraly Qoǵamdyq kommýnıkatsııa ortalyǵynda ótken brıfıngte Mańǵystaý oblystyq Іshki saıasat basqarmasy basshysynyń orynbasary Aqaı Mýsalıev málim etti, dep habarlaıdy Kazinform.
2022 jyly 16 maýsymda Ulytaýda ótken Ulttyq quryltaıdyń birinshi otyrysynda Qazaqstan Prezıdenti Respýblıka kúni mártebesin qaıta qalpyna keltirýdi jáne ony 25 qazanda ulttyq mereke retinde atap ótýdi usyndy. Respýblıka kúnin 25 qazanda atap ótýdiń sebebi 1990 jyldyń 25 qazanynda Qazaqstannyń Memlekettik egemendik týraly deklaratsııasy qabyldandy. Osylaısha elimizdiń táýelsizdigine alǵashqy qadam jasalǵan edi.
«Respýblıka kúnin joǵary deńgeıde atap ótý baǵytynda óńirlik is-sharalar jospary bekitilip, qarqyndy jumystar júrgizilip jatyr. Atap aıtqanda, josparǵa sáıkes Respýblıka kúnin keńinen nasıhattaý baǵytynda respýblıka kóleminde «Republic Day» aktsııasy ótkizilip jatyr. Aktsııanyń maqsaty – elde, odan tys jerlerde de turatyn qazaqstandyqtardyń basyn biriktirý, jalpyulttyq yntymaq pen birlikke shaqyrý. Aktsııa aıasynda áleýmettik jelilerde ekonomıkanyń barlyq salasynda qyzmet etetin ár túrli ult ókilderi, memlekettik qyzmetshiler, zııaly qaýym ókilderi, dárigerler, sportshylar, jastar arasynda beınequttyqtaýlar jarııalaý boıynsha chellendj uıymdastyrylyp jatyr», - dedi Aqaı Mýsalıev.
Sonymen qatar «Qyran elim – Qazaqstan!» patrıottyq aktsııasy aıasynda óńirdiń jastary arasynda, bilim berý uıymdarynda Memlekettik Ánurandy oryndaý, mánerlep oqý konkýrstaryn, úılerdiń aldyńǵy betteri men terezelerine Memlekettik Týdy ornalastyrý boıynsha jappaı fleshmobtar uıymdastyryldy.
Volonterlik jáne erikti uıymdar arqyly azamattardyń áleýmettik osal toptaryn qoldaý úshin «Janashyr Júrek» halyqtyq aktsııasy bastaý aldy. Qaıyrymdylyq ıdeıasyn iske asyrýǵa jergilikti bıznes-qoǵamdastyqtar, demeýshiler, metsenattar tartylady.
Mereke qarsańynda 18-19 qazan kúnderi «Oǵylandy Beket ata» qoǵamdyq qory tarapynan turmystyq jaǵdaıy tómen Jańaózen qalasynyń 7 otbasyna jáne Qaraqııa aýdanynan 6 otbasyna jańa páter kilti tabystaldy. 22 qazan kúni múmkindigi shekteýli jandarǵa arnalǵan «Ónerli ana men bala» festıvali ótedi.
20 qazan kúni Mańǵystaý oblystyq jastar resýrstyq ortalyǵynyń uıymdastyrýymen «Memlekettiń bolashaǵy Qazaq tilinde» mánerlep oqý saıysy ótedi. Mereke aıasynda salt-dástúrdi nasıhattaý baǵytynda Aqtaý qalasynda «Etno kún» is-sharasy, ulttyq oıyndar jarysy «Altyn saqa», etno mádenı birlestikterdiń qatysýymen «Tuǵyry bıik týǵan jer» kontserttik baǵdarlamasy, Beıneý aýdanynda taı jarysy, Mańǵystaý aýdanynda «Qusbegilikten» tuńǵysh ashyq oblystyq týrnır jáne basqa da sporttyq is-sharalar uıymdastyrylady.
Sondaı-aq óskeleń urpaqty qorshaǵan ortaǵa uqypty qaraý, ekologııalyq tárbıege shaqyrý baǵytynda «Taza tabıǵat» ataýymen jappaı ekologııalyq naýqan ótkiziledi. 21 qazan kúni «Green City Aktau» JShS tarapynan Aqtaý qalasynda aǵash otyrǵyzý aktsııasy ótpek. Ataýly merekeniń qarsańynda Jańaózen qalasy jáne Mańǵystaý, Túpqaraǵan jáne Munaıly aýdandarynda jańa sport keshenderin paıdalanýǵa berý josparlanyp otyr. Sondaı-aq Munaıly aýdanynda 3 jeke menshik balabaqshanyń saltanatty ashylý rásimi ótip, jańa medıtsınalyq ortalyq ashylady.
Sonymen qatar Respýblıka kúnine oraı turǵyndardy aqparattandyrý maqsatynda 41 merekelik bannerler jáne basqa da syrtqy kórnekilik quraldary ornalastyryldy.
«Respýblıka kúnin merekelik kúntizbede qaıta jańǵyrtý – bul urpaqtar sabaqtastyǵynyń, memlekettik táýelsizdik jolyndaǵy halqymyzdyń tarıhı eńbegi men erkindigin qurmetteýdiń sımvoly. Osy oraıda, óńir turǵyndaryn Respýblıka kúnine oraı ótetin sharalarǵa qatysyp, belsendilik tanytýǵa shaqyramyz!» - dedi Aqaı Mýsalıev.
