Mańǵystaýda Raýan aýylynyń turǵyndary mekteptiń janyndaǵy qurylysty toqtatýdy suraıdy
AQTAÝ. KAZINFORM — Ómirzaq aýylyna qarasty Raýan eldi-mekeniniń turǵyndary mektep pen balalar oıyn alańynyń arasyndaǵy qurylysqa qarsylyq bildirip jatyr. Atalǵan aýmaqqa aýyr tehnıkalar men júk kólikteri turaqtaıtyn avtopark salyna bastaǵan. Turǵyndar balalardyń qaýipsizdigine alańdaıdy.
— Aýyr júk kólikterdiń avtoturaǵy salynyp jatyr. Biz oǵan qarsymyz. Sebebi, mektepten shyqqan balalar osy jermen júredi. Osy tegis jerde velosıped pen samokat tebedi. Myna júk kólikteri bireýdi basyp ketse qaıtemiz? , — deıdi aýyl turǵyny Baıan Úmbetova.
Atalǵan aýmaq qorshalǵan. Qurylys jumystary júrip jatyr. Іshinde 3-4 aýyr tehnıka tur. Nysan — mektep pen balalar oıyn alańynyń ortasynda ornalasqan.
— Aýylda balalar oıyn alańy jetispeıdi. Ózi ekeý-aq, onyń da bireýi eski. 600 den astam bala bar. Olar qaıda baryp oınaıdy sonda? Qanshama halyq bar. Odan da osy jerge turǵyndarǵa saıabaq salyp berýdi suraımyz, — deıdi Sáýle Qoılanova.
Ómirzaq aýylynyń ákimi Bısenǵalı Kenjalıevtiń aıtýynsha, avtoturaq salynyp jatqan jer Aqtaý qalasyna tıisili. Sondyqtan aýyr tehnıkalar men júk kólikterin eldi-mekenge kirgizbeýdiń joldary qarastyrylady.
— Bul turaqtyń jeri qalanyń aýmaǵy, bizge qaramaıdy. Sondyqtan osy másele boıynsha sheshim qabyldaı almaımyz. Biraq, degenmen, qaladaǵy áriptestermen birge, júk kólikterin retteý boıynsha mindetti túrde sharasyn alamyz. Qajet bolatyn bolsa, jol belgisin qoıamyz. Arnaıy ruqsat alǵansha, kólik qoıdyrmaýǵa sharalar qabyldaımyz, — deıdi aýyl ákimi.
Buǵan deıin, Mańǵystaýda «Kezbı» munaı-servıs kompanııasynyń dırektory 10 jylǵa sottalǵany týraly jazǵan bolatynbyz.