Mańǵystaýda prokýratýra 1,3 mlrd teńgelik jobanyń jalǵasýyna yqpal etti
AQTAÝ. KAZINFORM - Mańǵystaý oblysynyń prokýratýrasy Investorlardyń quqyqtaryn qorǵaý komıtetiniń úılestirýimen alkogolsiz sýsyndar, mıneraldy jáne ózge de bótelkedegi sý óndiretin zaýyt salyp jatqan «AlekaSu» JShS-nyń quqyǵyn qorǵady, dep habarlaıdy QR Bas prokýratýrasynyń baspasóz qyzmeti.
Investıtsııalyq jobanyń quny – 1,3 mlrd teńge. Kásiporyn paıdalanýǵa berilgennen keıin saǵatyna 6 myń bótelkege deıin ónim shyǵaratyn óndiristik jelini iske qosý jáne jańa jumys oryndaryn ashý josparlanǵan.
Tekserý barysynda sýdy tuşylandyrý jónindegi shartty jasasý kezinde kommýnaldyq kásiporynnyń ınvestordan qoldanystaǵy zańnamada kózdelmegen qujattardy zańsyz talap etkeni anyqtaldy.
Sonyń saldarynan shart jasasý rásimi negizsiz sozylyp, ınvestıtsııalyq jobanyń iske asyrylýyna kedergi keltirilgen. Prokýrorlyq qadaǵalaý aktisi negizinde anyqtalǵan zańbuzýshylyqtar joıylyp, ınvestormen qajetti shart jasaldy. Bul ınvestıtsııalyq jobany odan ári iske asyrýǵa jáne zaýyt qurylysyna daıyndyq jumystaryn ýaqtyly bastaýǵa múmkindik berdi.
Prokýratýra organdary ákimshilik kedergilerdi joıý jáne ınvestorlardyń quqyqtaryn tıimdi qorǵaý baǵytyndaǵy júıeli jumystaryn jalǵastyrýda.
- Mańǵystaý oblysynyń prokýratýrasy ákimshilik kedergilerge nemese quqyqtarynyń ózge de buzylýyna tap bolǵan ınvestorlardy ınvestorlardyń quqyqtaryn qorǵaý jónindegi mobıldi topqa +7 (701) 333-13-12 telefony arqyly, sondaı-aq 115 Call-ortalyǵyna habarlasýǵa shaqyrady,-delingen habarlamada.
Osyǵan deıin Almaty oblysynda ınvestorlardyń jumysyna kedergi keltirgen 18 sheneýnik jazalanǵany týraly jazdyq.
