Mańǵystaýda Prezıdenttiń tapsyrmasymen qurylǵan ǵylymı keńestiń alǵashqy otyrysy ótti
AQTAÝ. KAZINFORM – Ǵylymı keńes - óńirdiń ózekti máselelerin ǵylymı negizdeme men tujyrymdamaǵa súıene otyryp sheshý maqsatynda, oblys ákimdigi janynan qurylǵan. Keńes otyrysyna óńirdiń ǵylymı qaýymdastyq ókilderi men iri óndiristik kásiporyndardyń basshylary qatysty.
- Ǵylymsyz, ǵalymdarsyz kóp qatelikke urynǵan jaǵdaılar boldy. Bul týraly Prezıdentimiz de árdaıym aıtyp júr. Kaspıı teńizi jaǵasynda ornalasqan óńirimizde balyq sharýashylyǵy áli jolǵa qoıylmaı tur. Sondaı-aq, aýyl sharýashylyǵy, aýyz sý máseleleri ókinishke oraı, áli sheshilgen joq. Mine, osyndaı birneshe baǵytty tańdap alyp, Mańǵystaý ǵalymdarymen shektelip qalmaı, bıýdjetten qarajat bólip, halyqaralyq ǵylymı tájirıbesi bar sheteldik ǵalymdarmen baılanysa otyryp, ólkemizdegi ózekti máselelerdi sheshýge jumystanýymyz qajet, - dedi Mańǵystaý oblysynyń ákimi Nurdáýlet Qılybaı.
- Aımaq basshysy ǵalymdardyń sheshimderi óńirdiń turaqty damýyna qandaı septigin tıgize alady degen úlken másele qoıdy. Biz ǵylymı keńestiń ár otyrysynda belgili bir taqyrypty alyp, oǵan óńirlik, ulttyq, halyqaralyq deńgeıdegi ǵylymı ortalyqtardyń mamandaryn tartyp, ózimizdiń naqty usynystarymyzdy beremiz, - Yessenov ýnıversıtetiniń Prezıdenti Berik Ahmetov.
Jıyn barasynda Yessenov ýnıversıteti, Mańǵystaý oblysynyń energetıka jáne turǵyn úı-kommýnaldyq sharýashylyq basqarmasy men «Mańǵystaý atom energetıkalyq kombınaty» arasynda Kaspıı teńizi akvasharýashylyǵy ǵylymı-qoldanbaly ortalyǵyn ashý boıynsha yntymaqtastyq týraly Memorandýmǵa qol qoıyldy.
Sondaı-aq, oblys ákimi Nurdáýlet Qılybaı ýnıversıtet aýmaǵynda salynyp jatqan «Yessenov Technopark», «Jastar parki», «Trıbýnaly stadıon» jáne Teńiz akademııasynyń jańa ǵımaratynyń qurylys jumystarymen tanysty.
