Mańǵystaýda ózine jaraqat salǵan sarbaz psıhıkalyq densaýlyq ortalyǵyna jatqyzyldy

AQTAÝ. KAZINFORM — Beıneý aýdanyndaǵy № 99116 áskerı bóliminde boryshyn ótep júrgen 18 jastaǵy Sultan Shyntemirov qazir Mańǵystaý oblystyq psıhıkalyq densaýlyq ortalyǵynda em alyp jatyr. 

Sarbazdyń anasy Laýra Shyntemirovanyń aıtýynsha, balasy áskerge barǵan kúnnen bastap qysym kórgen. Álimjettikke shydamaı birneshe ret ózine qol salmaq bolǵan.

— Maǵan komandıri telefon shalyp, «balańyzdyń júregi men búıreginde másele bar, sony dárigerge qaratýǵa apara jatyrmyz» dedi. Ol ótirik bolyp shyqty. Balamdy psıhıatrııalyq aýrýhanaǵa aparyp jatqyzǵan. Ony men basqa bir ata-anadan estidim, — deıdi sarbazdyń anasy Laýra Shyntemirova.

Oblystyq psıhıkalyq densaýlyq ortalyǵynyń dırektory Mádı Toqanov klınıkaǵa sýıtsıdke beıim úsh áskerı jetkizilgenin habarlady.

— Ózderine jaraqat salǵan, bilekteri syrylǵan. Olarmen psıholog, psıhoterapevt mamandar jumys istep jatyr. Jalpy jaǵdaılary jaqsy, 2-3 kúnde shyǵaramyz, — deıdi ortalyq basshysy.

Kazinform tilshisi atalǵan áskerı bólimge suraý salǵanymen osy ýaqytqa deıin jaýap kelip túsken joq.

Eske sala keteıik, buǵan deıin Shymkentte qaza tapqan sarbaz jer qoınyna tapsyrylǵan bolatyn.