Mańǵystaýda ósirilgen aqserke balyǵy ımporttyń 60%-yn almastyra alady

ASTANA. KAZINFORM – Mańǵystaý oblysynda bıyl 286 tonna balyq ósirý josparlanyp otyr. Óńirdiń erekshe áleýetti damý baǵyty jóninde ákim Nurdáýlet Qılybaı aıtyp berdi. 

Ákimniń sózinshe, akvasharýashylyqty damytý baǵytynda 2025-2027 jyldary 4 iri joba júzege asyrylady.

– Onyń ishinde, Ortalyq Azııada alǵash ret «Organic Fish» kompanııasynyń quny 11,9 mlrd teńgeni quraıtyn Kaspıı teńizinde 5 000 tonnaǵa deıin albyrt tuqymdas balyǵyn tor qorshamada ósirý jobasy bar. Qazir elimizge balyqtyń biraz bóligi Eýropa elderinen keledi, tipti jylyna 8 myń tonna balyq ımporttalady. Sondyqtan kelesi jyly 1 300 tonna aqserke balyǵyn ósirý arqyly ımporttyń 16%-yn qysqartamyz, - dedi N. Qılybaı elordada Ortalyq kommýnıkatsııalar qyzmetinde.

Sonymen birge, 2029 jylǵa qaraı balyq óndirisin 5 myń tonnaǵa deıin kóbeıtý josparda tur. Nátıjesinde, respýblıka boıynsha ımporttyń shamamen 60%-yn qamtamasyz etedi.

Buǵan deıin N. Qılybaı túıe sútin untaqqa aınaldyryp, eksporttaıtyn jańa jobalar týraly aıtqan edi.