Mańǵystaýda Ortalyq Azııadaǵy alǵashqy teńiz akvasharýashylyq jobasy bastaldy
AQTAÝ. KAZINFORM — 5 qyrkúıek kúni Mańǵystaý oblysynyń Quryq portynda Kaspıı teńizinde teńiz akvasharýashylyǵyn damytýǵa arnalǵan alǵashqy tor qorshamalar sýǵa túsirildi.
Bul shara Qazaqstan teńiz akvasharýashylyǵyn damytýdyń is júzinde júzege asyryla bastaǵanyn kórsetedi.
— Úsh úlken tor qorshama men arnaıy ıakor júıesinen turatyn jabdyq Norvegııada jasalyp, Kaspıı teńiziniń tabıǵı jaǵdaıyna beıimdelgen. Quryq portyna jetkizilgen tor qorshamalar sheteldik jáne otandyq mamandardyń kúshimen qurastyrylyp, porttan 20 shaqyrym ońtústiktegi teńiz aýmaǵyna ornatyldy. Ekologııalyq jaǵynan teńizge esh zııany joq, — delingen Mańǵystaý oblysy ákimdiginiń baspasóz qyzmeti habarlamasynda.
Kelesi kezeńde tor qorshamalardy balyqpen toltyrý josparlanǵan. Bul — Qazaqstan men Kaspıı teńizi tarıhyndaǵy eń úlken tor qorshamalar: árqaısysynyń aınalymy 120 metr, tereńdigi 25 metr. Alǵashqy eki jylda óndiris kólemi 300-den 1600 tonnaǵa deıin jetip, keıin jylyna 5000 tonnaǵa deıin ulǵaıýy kózdelgen. Sonymen qatar 80-nen astam jańa jumys orny ashylmaq.
Joba tabıǵı taza ortada kaspıı albyrty tuqymdas balyq ósirýge baǵyttalǵan. Balyqtar ekologııalyq taza jemmen qorektenip, teńizdiń tabıǵı jaǵdaıynda ósirilmek. Bul olardyń paıdaly qasıetterin tolyq saqtaýǵa múmkindik beredi.
Teńiz akvasharýashylyǵy jobasy Norvegııa akvakýltýra ınstıtýtynyń kópjyldyq ǵylymı zertteýlerine negizdelip ázirlendi.
Zertteýler barysynda teńiz sýynyń gıdrologııalyq, gıdrofızıkalyq jáne gıdrohımııalyq sıpattamalary, sondaı-aq ýchaskeniń batımetrııasy jan-jaqty zertteldi.
Oblys ákimi Nurdáýlet Qılybaı bul bastama Mańǵystaýdyń agroónerkásiptik áleýetin jańa deńgeıge kóterip, halqymyzdyń ıgiligine qyzmet etetinin atap ótti.
— Búgin biz Mańǵystaý oblysy úshin ǵana emes, búkil Qazaqstan úshin tarıhı máni bar mańyzdy oqıǵanyń kýási bolyp otyrmyz. Elimizde alǵash ret teńiz tor qorshamada balyq ósirý sharýashylyǵy iske qosylyp, Kaspıı teńizine alǵashqy tor qorshamalar túsirilýde. Bul joba — Memleket basshysynyń agroónerkásip keshenin ártaraptandyrý, akvasharýashylyǵyn damytý jónindegi tapsyrmasy aıasynda iske asyrylyp otyr. Bul bastama jańa jumys oryndaryn ashýǵa, jastardy zamanaýı balyq sharýashylyǵy salasyna tartýǵa múmkindik beredi. Bul — Qazaqstan akvasharýashylyǵynyń jańa kezeńi bastalǵanynyń aıqyn belgisi. Bul joba Qazaqstandaǵy teńiz akvasharýashylyǵynyń damýyna jol ashyp qana qoımaı, aımaqtyq ekonomıkalyq ósimge, eksporttyq áleýettiń artýyna jáne ekologııalyq turaqtylyqtyń saqtalýyna zor úles qosady, — dedi. Nurdáýlet Qılybaı.
Aıta ketelik Mańǵystaýda qustardy qorǵaý jobasynan shý shyqqan edi.