Mańǵystaýda órt sóndirý kóligi turǵyn úıge soǵylyp, eki adam qaza tapty

AQTAÝ. KAZINFORM — Qaıǵyly jaǵdaı Jańaózen qalasynda bolǵan. 

Búgin 18 qańtarda Jańaózen qalasy Manat kóshesinde shaqyrtýǵa bara jatqan órt sóndirý kóligi men jeńil avtokólik soǵysyp, jol-kólik apaty bolǵan. Saldarynan órt sóndirý kóligi jeke turǵyn úıge soǵylǵan. 

Oblystyq polıtsııa departamenti baspasóz qyzmetiniń habarlaýynsha, jol-kólik apatynan eki adam mert bolǵan. 

— Jol apaty saldarynan 2 adam qaza taýyp, 5 adam zardap shekti. Túrli dene jaraqatyn alǵandardyń arasynda úsh órt sóndirýshi bar. Barlyǵy da aýrýhanaǵa jetkizildi, — delingen habarlamada. 

Atalǵan derek boıynsha sotqa deıingi tergep-tekserý bastalǵan. Qazirgi ýaqytta oqıǵanyń mán-jaıy men sebepteri anyqtalyp jatyr. Qylmystyq is polıtsııa departamenti basshylyǵynyń baqylaýynda.

Buǵan deıin, Mańǵystaýda avtobýs apatqa ushyrap, 5 adam qaza tapqan bolatyn.