Mańǵystaýda óńirdiń salt-dástúri men ádet-ǵuryptaryn tanystyratyn kórme ashyldy
AQTAÝ. KAZINFORM – Aqtaý qalasyndaǵy Ábish Kekilbaıuly atyndaǵy Mańǵystaý oblystyq tarıhı-ólketaný mýzeıinde aımaqtyń baı rýhanı-mádenı murasy qoıylǵan Mańǵystaý «Etnografııa» zaly iske qosyldy.
Aýmaǵy 600 sharshy metrdi quraıtyn jańa ekspozıtsııalyq zalda óńirdiń dástúrli mádenıeti, turmysy, qolóneri men tarıhı-mádenı qundylyqtary keńinen qamtylǵan.
Kórmede dinı-nanym senimder men ıslam dini, ólke etnografııasyn zertteýshi ǵalymdar toby, Mańǵystaý qudyqtary, egin sharýashylyǵy jáne baqtashylyq, Adaı jylqysy, ańshylyq dástúr men tas qashaý óneri, ólkeniń mýzykalyq muralary, ulttyq kıim úlgileri, teri men súıekten jasalǵan buıymdar, aǵashtan jasalǵan buıymdar men ulttyq oıyn jáne aıaq-kıim úlgileri men kıiz úıler sııaqty birneshe baǵyt qamtylǵan.
Mańǵystaý oblystyq mádenıet, tilderdi damytý jáne arhıv isi basqarmasynyń basshysy Nurtas Salıdiń aıtýynsha, kórmeni jasaqtaýǵa jarty jyl ýaqyt ketken. Zaldyń taqyryptyq qurylymdyq jáne taqyryptyq ekspozıtsııalyq jospary byltyr jasaqtalyp, bıyl maýsym aıynan bastap qurylys jumystary júrgizilgen.
- «Etnografııa» zalyna alǵash ret «Mańǵystaýdyń kúmis álemi» ataýymen zergerler qolynan shyqqan 250 astam kúmis jádigerler toptamasy qoıyldy. Zaldyń jasaqtalýy qarsańynda adaıdyń bes júırigi Qashaǵan Kúrjimanulynyń jáne bı ári, bolys bolǵan Óserbaı Sársenbaıulynyń dombyralary mýzeı qoryn tolyqtyryp, ekspozıtsııadan oryn aldy.
Ekspozıtsııanyń aýmaǵynda 3 taqyryptyq dıoramma, 6 kórkemdik panno ólkemizdiń salt-dástúrimen, ádet-ǵurpynan málimet beretin arnaıy taqyryptarda jasaqtaldy. Sonymen qatar kıiz úı evalıýtsııasynan bastap, tarıhı sáýlet eskertkishteriniń arnaıy maketteri jasaqtalyp, kópshilik nazaryna usynyldy. Atalǵan ekspozıtsııa zaly ólkemizdiń mol murasy jaıly kólemdi aqparat beredi, - deıdi Nurtas Salı.
Ábish Kekilbaıuly atyndaǵy Mańǵystaý oblystyq tarıhı-ólketaný mýzeıi – ólke tarıhynan syr shertetin rýhanı-mádenı qundylyqtardy, óńirdiń baǵa jetpes baılyǵy-asyl muralary men tanymal tulǵalary týraly derekterdi jınaqtap, zerttep-zerdelep, nasıhattaıtyn mádenı oshaq.
Munda Ábish Kekilbaıulynyń ómiri men shyǵarmashylyǵyna arnalǵan, Qazirgi Qazaqstan, Tarıh, Arheologııa, Munaı óndirisi, Aqtaý qalasy jáne Qazaqstan halqy assambleıasynyń tarıhy ekspozıtsııalyq zaldary, sonymen qatar «Etnografııa» jáne «Mańǵystaýdyń túz taǵylary», «Tetıs qupııalary» kórme zaldary jumys isteıdi.
Buǵan deıin, Astanada Qazaqstan mýzeıleriniń biryńǵaı tsıfrlyq júıesi tanystyrylǵan bolatyn.
