Mańǵystaýda óndiristik qubyrlardy urlaǵan qylmystyq top ustaldy
AQTAÝ. KAZINFORM — Oqıǵa Jańaózen qalasynda tirkeldi. Іri kólemde qara metall urlaý deregi boıynsha qylmystyq is qozǵaldy.
— 2026 jylǵy 17 aqpanda Jańaózen qalasy polıtsııa basqarmasyna arnaıy aqparat kelip tústi. № 1 Munaı jáne gaz óndirý basqarmasynyń aýmaǵynan buryn qoldanylǵan dıametri 720 mm óndiristik qubyrlar shyǵarylyp, qara metall qabyldaý ornyna ótkizilgen. 19 aqpan kúni Mańǵystaý oblysy prokýratýrasynyń úılestirýimen, sý, áýe jáne temirjol kóliginde jasalatyn qylmystardyń aldyn-alý jáne anyqtaý maqsatynda júrgizilgen jedel-izdestirý is-sharalary barysynda krımınaldyq polıtsııa qyzmetkerleri men jedel áreket etý arnaıy jasaq qyzmetkerleri qylmystyq toptyń áreketin áshkereledi, — delingen habarlamada.
Tekserý barysynda kúdiktilerdiń jalǵan qujattardy paıdalana otyryp, kvazımemlekettik sektorǵa tıesili dıametri 720 mm óndiristik qubyrlardy urlap, olardy qara metall qabyldaý oryndaryna ótkizgeni anyqtaldy.
Qara metall qabyldaý ornyn tekserý kezinde jalpy sany 24 dana, dıametri 720 mm qubyr tabylyp, zańdy ıesine jaýapkershilikpen saqtaý úshin tapsyrylǵan.
Kúdiktiler ustalyp, ýaqytsha ustaý ızolıatoryna qamaýǵa alyndy. Qazirgi ýaqytta sotqa deıingi tergep-tekserý amaldary júrgizilip jatyr.
Buǵan deıin, Qaraǵandy oblysynda páter urlyǵymen aınalysqan qylmystyq top ustalǵan bolatyn.