Mańǵystaýda óndiris oryndary men kásipkerlerge Prezıdent Joldaýynyń basym baǵyttary túsindirildi

Jumys toby aldymen Jańaózen qalasyndaǵy «Ózenmunaıgaz» AQ qyzmetkerlerimen kezdesti. Jıynǵa Quryltaı depýtaty Abbat Órisbaev, QR Energetıka vıtse-mınıstri Qaıyrhan Tutqyshbaev, QR Densaýlyq saqtaý mınıstrligi Medıtsınalyq baqylaý komıtetiniń tóraıymy Laýra Ahmetnııaz jáne «Ózenmunaıgaz» AQ bas dırektory Janbolat Saımaǵambetov qatysty.

Kezdesýde Joldaýdyń negizgi basymdyqtary, ekonomıkany damytý, munaı-gaz salasyn jańǵyrtý, áleýmettik ınfraqurylymdy jetildirý, energetıkalyq qaýipsizdik pen medıtsına salasyndaǵy ózgerister talqylandy.

Quryltaı depýtaty Abbat Órisbaev «Halyqtyq qurylys» jáne «Halyqtyq tsıfrlyq ekonomıka» bastamalarynyń mańyzyna toqtalyp, áleýmettik nysandardyń sapasyn arttyrý, memlekettik qarajattyń tıimdi ári ashyq jumsalýyn qamtamasyz etý máselelerin túsindirdi.

- Joldaýdyń basty maqsaty – ekonomıkany ulǵaıtý, halyqtyń tabysyn arttyrý jáne árbir azamattyń ómir sapasyn jaqsartý. «Halyqtyq qurylys» baǵyty tek ǵımarattar salýmen shektelmeıdi. Ol – sapaly qyzmet kórsetý, bilikti mamandarmen qamtamasyz etý jáne áleýmettik ınfraqurylymdy damytý. Munaı-gaz salasyn jańǵyrtý da mańyzdy mindetterdiń biri. Búginde tek munaı óndirý jetkiliksiz, shıkizatty tereń óńdep, quny joǵary ónim shyǵarýǵa basymdyq berýimiz qajet. Sonymen qatar munaıshylardyń eńbek quqyǵyn qorǵaý, qaýipsiz jumys jaǵdaıyn qamtamasyz etý, turaqty jumyspen qamtý jáne áleýmettik kepildikterdi kúsheıtý – basty nazardaǵy máseleler, - dedi Abbat Órisbaev.

QR Energetıka vıtse-mınıstri Qaıyrhan Tutqyshbaev energetıka salasyndaǵy jańǵyrtý jumystary, elektr energııasyn óndirý qýatyn arttyrý, gazdandyrý jáne jańartylatyn energııa kózderin damytý josparlary týraly aıtty.

- Mańǵystaý oblysynda da energetıkalyq ınfraqurylymdy jańǵyrtýǵa basymdyq berilgen. 2030 jylǵa deıin 419 shaqyrym elektr jelisin aýystyrý josparlanyp otyr. Al jylý jelilerin jańartý jumystary 2029 jylǵa deıin júrgiziledi. Bul jumystar ınjenerlik ınfraqurylymnyń tozý deńgeıin tómendetip, turǵyndardy sapaly ári turaqty jylýmen jáne elektr energııasymen qamtamasyz etýge baǵyttalǵan, - dedi Qaıyrhan Tutqyshbaev.

Vıtse-mınıstrdiń aıtýynsha, 2035 jylǵa qaraı eldi mekenderdi gazdandyrý deńgeıin 80 paıyzǵa jetkizý kózdelgen.

Al Laýra Ahmetnııaz densaýlyq saqtaý salasyndaǵy basym baǵyttarǵa toqtalyp, medıtsınalyq nysandardy salý men qoldanystaǵy ınfraqurylymdy jańartý, sondaı-aq medıtsına qyzmetkerlerin qoldaý sharalary týraly málimet berdi.

- Memleket basshysy densaýlyq saqtaý salasynda eki negizgi baǵytty aıqyndady. Birinshisi – medıtsınalyq nysandar salý jáne qoldanystaǵy ınfraqurylymdy jańartý. Ekinshisi – medıtsınalyq-sanıtarııalyq alǵashqy kómek kórsetetin ýchaskelik qyzmet mamandarynyń jalaqysyn arttyrý. Bul sharalar medıtsınalyq kómektiń qoljetimdiligi men sapasyn jaqsartýǵa baǵyttalǵan. 2027 jyldan bastap medıtsınalyq-sanıtarııalyq alǵashqy kómek kórsetetin ýchaskelik qyzmet mamandarynyń eńbekaqysyn arttyrý kózdelip otyr. Bul bastama 77 myńnan astam medıtsına qyzmetkerin qamtıdy. Nátıjesinde jalpy praktıka dárigerleriniń jalaqysy 42 paıyzǵa ósedi. Bul medıtsınalyq kadrlardy qoldaýǵa jáne maman tapshylyǵyn azaıtýǵa baǵyttalǵan, - dedi Laýra Ahmetnııaz.

Budan keıin jumys toby «Qazaq gaz óńdeý zaýyty» JShS ujymymen kezdesti. Jıynda munaı-gaz keshenin jańǵyrtý, gaz óńdeý qýatyn arttyrý, energetıkalyq ınfraqurylymdy damytý jáne medıtsına qyzmetkerlerin qoldaý máseleleri sóz boldy.

Aqtaý qalasyndaǵy teńiz portynyń eńbek ujymymen de kezdesý uıymdastyryldy. Oǵan Qazaqstan Halyq keńesiniń múshesi, Mańǵystaý oblystyq qoǵamdyq keńesiniń tóraǵasy Bekmurat Júsipov, oblystyq aqsaqaldar keńesiniń tóraǵasy Ońaıbek Ábdilov, Qazaqstan Halyq keńesiniń múshesi, ekolog Kırıll Osın, «Ádilet» partııasy Mańǵystaý oblystyq fılıaly tóraǵasynyń orynbasary Anar Shamshadınova jáne Memlekettik áleýmettik saqtandyrý qory AQ Mańǵystaý oblysy boıynsha fılıalynyń dırektory Seıtjan Qojamuratov qatysty.

Kezdesý barysynda Joldaýdaǵy ekonomıkalyq jáne áleýmettik reformalar, óńirdiń tranzıttik áleýetin arttyrý, áleýmettik qorǵaý júıesin jetildirý máseleleri talqylandy. Seıtjan Qojamuratov 2027 jyldan bastap kúshine enetin áleýmettik tólemderge qatysty ózgeristerdi túsindirdi. Onyń aıtýynsha, resmı jumys isteıtin azamattar úshin jumysynan aıyrylý, eńbek etý qabiletinen aıyrylý, asyraýshysynan aıyrylý, júktilik pen bosanýǵa baılanysty jáne bala bir jarym jasqa tolǵanǵa deıingi kútimine arnalǵan bes túrli áleýmettik tólem saqtalady. Budan bólek, jumys toby «MańǵystaýMunaıGaz» AQ qyzmetkerlerimen kezdesti. Kezdesý barysynda Joldaýdaǵy saıası jáne ekonomıkalyq reformalar, munaı-gaz salasyn damytý máseleleri talqylandy. Kırıll Osın eldegi saıası jáne ekonomıkalyq ózgeristerge toqtalyp, olardyń óńir úshin mańyzyn túsindirdi.

Sonymen qatar jumys toby Aqtaý qalasyndaǵy «Atameken» kásipkerler palatasynda óńir kásipkerlerimen kezdesti. Jıynǵa QR Ulttyq ekonomıka mınıstrligi Tabıǵı monopolııalardy retteý komıtetiniń tóraǵasy Tımýr Qosymbaev, Qazaqstan Halyq keńesiniń múshesi Raýshan Aımýrzaeva, «Ádilet» partııasy Mańǵystaý oblystyq fılıaly tóraǵasynyń orynbasary Nurbek Qarasaev jáne partııa múshesi Zareta Fatalıeva qatysty.

Kezdesýde ınvestıtsııa tartý, ekonomıkany damytý, kásipkerlikti qoldaý jáne jasandy ıntellekt tehnologııalaryn engizý máseleleri qozǵaldy. Mańǵystaý oblysy kásipkerler palatasy dırektorynyń orynbasary Shynar Ahmetqalıeva ózara baılanysty nyǵaıtyp, ortaq maqsatta júıeli jumys júrgizýdiń mańyzyn jetkizdi.

- Joldaýda ınvestıtsııa tartý, ekonomıkany damytý jáne jasandy ıntellektti paıdalaný máseleleri kóterildi. Bul baǵyttar boıynsha kásipkerler palatasy óz jumysyn jalǵastyryp keledi. Endigi mindet – memlekettik organdar, kásipkerler palatasy jáne bıznes ókilderi arasynda ózara baılanysty nyǵaıtyp, ortaq maqsatta júıeli jumys júrgizý, - dedi Shynar Ahmetqalıeva.

Jumys toby «OilConstructionCompany» JShS qyzmetkerlerimen de kezdesti. Óndiris jónindegi bas dırektordyń orynbasary Rýslan Sısenǵalıev Joldaýda aıtylǵan mindetter men aldaǵy josparlarǵa toqtalyp, kelesi jyly óńirde aýrýhana men mektep qurylysy sekildi áleýmettik nysandardy damytýǵa basymdyq beriletinin aıtty. Sondaı-aq «Halyqtyq qurylys» bastamasynyń áleýmettik ınfraqurylymdy jetildirý men memlekettik qyzmetterdiń qoljetimdiligin arttyrýdaǵy róli talqylandy.

Al Munaıly aýdanynda «Qazaqstan temir joly» ulttyq kompanııasy» AQ-nyń «Magıstraldyq jeliniń Mańǵystaý bólimshesi» fılıaly qyzmetkerlerimen kezdesý ótti. Jıynda qoǵamdyq kólik qatynasy, kólik baılanysyn jaqsartý, eldi mekender arasyndaǵy qatynasty damytý jáne turǵyndarǵa qolaıly jaǵdaı jasaý máseleleri kóterildi.

Kezdesýler barysynda eńbek ujymdary men kásipkerler ózderin tolǵandyrǵan suraqtaryn qoıyp, usynystaryn jetkizdi. Jumys tobynyń músheleri Joldaýda belgilengen mindetter men olardy óńirde júzege asyrý baǵyttary boıynsha túsindirý jumystaryn júrgizdi.