Mańǵystaýda óńdeý ónerkásibi 39%-ǵa ósti
ASTANA. KAZINFORM — Mańǵystaý oblysynyń ónerkásip kásiporyndary jyl basynan beri 2,1 trln teńgege ónim óndirip, 3,6%-ǵa naqty ósim kórsetti. Bul týraly Úkimettiń baspasóz qyzmeti habarlady.
Memleket basshysynyń ulttyq ekonomıkany ártaraptandyrý jáne eldiń kólik-logıstıkalyq áleýetin ashý jónindegi tapsyrmalaryn júzege asyrý aıasynda Mańǵystaý oblysynda óńdeý sektory men ınfraqurylymdyq áleýetin nyǵaıtý boıynsha júıeli jumys júrgizilýde.
2026 jyldyń birinshi jartyjyldyǵynyń qorytyndysy boıynsha óńir negizgi baǵyttarda turaqty damý qarqynyn kórsetti. Ekonomıkalyq ósimniń negizgi úlesi óńdeý ónerkásibi, qurylys salasy jáne kólik-logıstıka kesheni esebinen qamtamasyz etildi.
Mańǵystaý oblysynyń ónerkásip kásiporyndary jyl basynan beri 2,1 trln teńgege ónim óndirip, 3,6%-ǵa naqty ósim kórsetti. Ónerkásip óndirisiniń qurylymynda negizgi ózgerister baıqalýda: dástúrli óndirýshi salalarmen qatar óńdeý ónerkásibi ozyq ósim qarqynyn kórsetti. Bıylǵy qańtar–maýsym aılarynda óńdeý ónerkásibinde óndirilgen ónim kólemi 39%-ǵa artyp, 186 mlrd teńgege jetti. Bul kórsetkishter shıkizattyq emes sektordyń dáıekti túrde keńeıip kele jatqanyn jáne qosylǵan quny joǵary ónim óndirisiniń artyp otyrǵanyn aıqyn kórsetedi. Oń serpin ınvestıtsııa salasynda da saqtalyp otyr. Alty aıdyń qorytyndysy boıynsha negizgi kapıtalǵa salynǵan ınvestıtsııa kólemi shamamen 500 mlrd teńge boldy.
Ónerkásiptik jáne kólik ınfraqurylymynyń damýy óńirdiń qurylys kesheniniń qarqyndy jumysyna serpin berýde. Nátıjesinde oryndalǵan qurylys jumystarynyń kólemi 11,8%-ǵa ósip, 178,3 mlrd teńge bolady.
Óńirde turǵyn úı qurylysy da qarqyndy jalǵasyp jatyr. Jyl basynan beri 275 myń sharshy metr turǵyn úı paıdalanýǵa berildi. Bul ótken jyldyń sáıkes kezeńimen salystyrǵanda 4,6%-ǵa joǵary. Turǵyn úı qorynyń ulǵaıýy halyqtyń turmys sapasyn jaqsartyp, qalalyq ınfraqurylymnyń odan ári damýyna yqpal etip otyr.
