Mańǵystaýda on kúnde bes balany qaraqurt shaqty
AQTAÝ. KAZINFORM — Mańǵystaý oblysynda qaraqurt shaǵý jaǵdaılary jıilep, maýsymnyń alǵashqy on kúninde bes bala aýyr jaǵdaıda aýrýhanaǵa jetkizildi.
Oblystyq kópbeıindi balalar aýrýhanasynyń málimetinshe, 2025 jyly medıtsınalyq mekemege qaraqurt shaqqan úsh bala ǵana túsken. Al bıyl maýsym aıynyń alǵashqy on kúninde mundaı bes jaǵdaı tirkelip otyr.
Barlyq bala aýrýhanaǵa aýyr halde jetkizilip, jansaqtaý bóliminde em qabyldaǵan. Naýqastardyń jaǵdaıy turaqtanǵannan keıin beıindi bólimderge aýystyrylǵan.
Mamandardyń aıtýynsha, jaz mezgilinde qaraqurttyń belsendiligi artady. Osyǵan baılanysty qaýipti órmekshimen kezdesip qalý qaýpi de joǵarylaıdy.
-Qaraqurttyń shaǵýy qatty aýyrsyný men kúıdirý sezimin týdyrýy múmkin. Sonymen qatar aýyrsyný denege taralyp, bulshyqet qurysýy, álsizdik, tersheńdik, júrek aıný, qusý, bas aınalý jáne júrek soǵysynyń jıileýi sııaqty belgiler baıqalady, - deıdi dárigerler.
Medıtsına mamandary qaraqurt shaqqan jaǵdaıda balanyń qozǵalysyn shektep, shaqqan jerdi sabyndy sýmen jýyp, salqyn kompress qoıýdy jáne múmkindiginshe tez arada medıtsınalyq kómekke júginýdi eskertedi. Dárigerler halyqtyq emdeý tásilderin qoldanýǵa nemese shaqqan jerdi óz betinshe kesýge qatań bolmaıtynyn aıtady.
Mamandar ata-analarǵa tabıǵat aıasynda demalǵan kezde balalardyń qaýipsizdigine erekshe nazar aýdarýǵa keńes beredi. Kıim men aıaq kıimdi kıer aldynda muqııat tekserip, qaǵyp alý qajet. Sondaı-aq órmekshiler jasyrynýy múmkin tastarǵa, butalarǵa jáne basqa da qýys oryndarǵa jaqyndamaǵan jón.
Dárigerler qaraqurt shaqty degen kúdik bolǵan jaǵdaıda, ásirese bala zardap shekse, birden medıtsınalyq kómekke júginý kerektigin atap ótti. Ýaqytyly kórsetilgen kómek aýyr asqynýlardyń aldyn alyp, densaýlyqty saqtaýǵa múmkindik beredi.
Buǵan deıin, Mańǵystaýda qaraqurttan zardap shekkender sany artqanyn jazǵan bolatynbyz
