Mańǵystaýda oqýshylardyń jappaı ýlanǵany úshin kimder jaýapqa tartyldy

ASTANA. KAZINFORM – Oqý-aǵartý mınıstri Ǵanı Beısembaev Mańǵystaýda tamaqtan ýlanǵan oqýshylar jóninde pikir bildirdi.

«Tamaqtaný máselesine baılanysty ony uıymdastyrǵan kásipkerlerdiń jaýapkershiligi máselesin únemi kóterip kelemin. Naqty Mańǵystaý oblysy boıynsha tamaqtandyrýmen aınalysqan kásipker mektepten alastatyldy. Meniń bilýimshe, budan bylaı bul kásipker eshbir mektepke aralasýyna shekteý qoıyldy. Odan bólek, tıisti jaýapty tulǵalar jaýapkershilikke tartyldy. Bilim basqarmasynyń basshysy jumystan ketti, ákim orynbasary jaýapqa tartyldy, oǵan qosa kásipkerlermen kelisimshart toqtatylyp, basqa kásipkerge almastyryldy», - dedi mınıstr.

Eske salaıyq, Mańǵystaýdyń Munaıly aýdanynda bir mekteptiń 500-ge jýyq oqýshysy astan ýlanyp qaldy.

Olardyń barlyǵy mektep ashanasynda tegin ystyq tamaq ishkennen keıin aýyrǵan.

Osy oqıǵadan keıin búkil el boıynsha mektepterdiń ashanasy tekseriletin boldy.

Sondaı-aq Úkimet otyrysynan keıingi brıfıngte Densaýlyq saqtaý mınıstri Aqmaral Álnazarova 387 bala ambýlatorlyq em alyp jatsa, 75 bala áli de aýrýhanada ekenin aıtqan edi.