Mańǵystaýda oqýshylar ýlanǵan mektep ashanasynan zań buzýshylyqtar anyqtaldy

AQTAÝ. KAZINFORM – Mańǵystaý oblystyq Sanıtarlyq epıdemıologııalyq baqylaý departamenti mamandary júrgizgen tekserý nátıjesinde, as daıyndaıtyn qyzmetkerlerdiń birinen stafılokokk tabylǵan. Al taǵy eki jumysshy mindetti medıtsınalyq tekserýden ótpegen bolyp shyqty.

- As úıden alynǵan 9 synamadan ishek taıaqshasy bakterııalary, daıyn taǵamdardyń 6 úlgisinen zııandy mıkroorganızmder anyqtaldy. Al dándi daqyldar kókónister qoımasynda saqtalǵan. Ashanada dymqyl tazalaý júrgizilmegen, - deıdi departament basshysy Muhtar Serbaev.

Vedomstvo basshysynyń aıtýynsha, saraptama qorytyndysy sotqa deıingi tergeý úshin polıtsııaǵa berilgen. Qazir ashana jabyq. Biraq oqýshylar oqýyn jalǵastyryp jatyr.

Buǵan deıin Mańǵystaýdyń Beıneý aýdanynda 11 oqýshy birdeı dıagnozben aýrýhanaǵa jetkizilgeni týraly jazǵan bolatynbyz.