Mańǵystaýda nóser jaýynnan keıin júzden astam jylqy qyryldy
AQTAÝ. KAZINFORM – Aımaqta 14-15 sáýir kúnderi ekpindi jel soǵyp, nóser jaýyn jaýǵan bolatyn. Sonyń saldarynan jylqylar qyrylyp qalǵan. Bul týraly jergilikti turǵyndar áleýmettik jelilerde jazyp, dabyl qaqty.
– Mańǵystaýda jańbyrdan keıin Aqshymyraý aýyly mańyndaǵy maldy sý aǵyzyp áketip, sorǵa túsirgen. Kóptegen jylqy tuzdy batpaqqa batyp óldi, taǵy bir bóligi áli shyǵa almaı jatyr. Eger tótenshe jaǵdaılar qyzmeti men jergilikti bılik kómek kórsetpese, jaǵdaı odan ári ýshyǵýy múmkin, - dedi turǵyndar
Osy jaǵdaıǵa baılanysty oblysta arnaıy komıssııa qurylyp, shalǵaıdaǵy aýyl-aımaqtarda monıtorıng jumystary júrgizilip jatyr.
Aldyn ala derekter boıynsha, júzden astam jylqy qyrylǵan. Qazirgi ýaqytta jergilikti atqarýshy organdar mal shyǵynynyń naqty sanyn anyqtap jatyr. Óıtkeni sharýalar áli tolyq esep júrgize almaı otyr. Al jylqylardyń qyrylýyna – qolaısyz aýa raıy, ıaǵnı qatty jel men nóser jańbyr sebep bolǵan. Baǵytynan jańylǵan janýarlar ylǵaldy, baqpaqqa túsip, ólgen.
- Búginde oqıǵanyń saldaryn joıý úshin barlyq kúsh qurylymdary jumyldyryldy. Óńirdegi iri kásiporyndardyń tehnıkasy, tótenshe jaǵdaılar qyzmetteri jáne jergilikti atqarýshy organdar tartylǵan. Sýdy sorý jáne qalpyna keltirý jumystary kúsheıtilgen rejımde júrgizilip jatyr. Jaǵdaı erekshe baqylaýda. Mal ıelerimen jumys júrgizilip jatyr, zamanaýı monıtorıng quraldary men arnaıy tehnıka qoldanylyp jatyr, - dep habarlady Mańǵystaý aýdany ákimdigi.
Buǵan deıin, Mańǵystaýda ıtbalyqtar qyrylyp jatqanyn jazǵan bolatynbyz.
