Mańǵystaýda nóser jaýyn saldarynan 500-den astam mal qyryldy
AQTAÝ. KAZINFORM – Jylqylary qyrylǵan sharýalar jergilikti bılikten ótemaqy tóleýdi jáne ólgen janýarlardy joıý jumystaryn uıymdastyrýdy suraıdy. Osy jaǵdaıǵa baılanysty oblys ákimgi túsinikteme berdi.
Qaraqııa aýdany ákimdiginiń habarlaýynsha, 20-sáýirde 237 bas mal tabylǵan. Onyń 108-i jylqy. 5-eýi taı, 10-y qulyn.
Sonymen qatar, 2 túıe, 5 bota, 107 qoı men eshki bar.
Al, 21- sáýirde ólgen 316 bas mal anyqtalǵan. Jylqy - 134, taı - 9 bas, qulyn - 19, 154 qoı men eshki. Osylaısha, eki kún ishinde aýdan boıynsha jalpy sany 553 bas mal shyǵyny tirkelgen.
Mańǵystaý oblysynyń ákimdigi jaǵdaıǵa qatysty pikir bildirdi.
- Qazirgi ýaqytta Qaraqııa aýdanynda jerdiń shaıylyp, batpaqtanýyna baılanysty jergilikti atqarýshy organdar óndiristik kásiporyndarmen birlesip arnaıy tehnıkalardy tartý jumystaryn júrgizýde. Qazir mal basyn esepke alý jáne tıisti aktilerdi rásimdeý jumystary atqarylyp jatyr. Aktiler jasalyp, janýarlar chıpteri arqyly sáıkestendirilgennen keıin, veterınarlyq qyzmetpen birge arnaıy tehnıka qoldana otyryp, qyrylǵan maldy joıý jumystary bastalady. Mal shyǵyny boıynsha ótemaqy tóleý máselesi qoldanystaǵy zańnama aıasynda qaralatyn bolady, - dep habarlady oblys ákimdigi.
Buǵan deıin, Mańǵystaýda nóser saldarynan qyrylǵan jylqylardyń sany eseptelip jatqanyn jazǵan bolatynbyz.
