Mańǵystaýda nóser saldarynan qyrylǵan jylqylardyń sany eseptelip jatyr
AQTAÝ. KAZINFORM – Janýarlar Aqshymyraý men Saıótes aýyldary aýmaǵynda jappaı qyrylǵan. Biraq ázirge naqty qansha jylqy ólgeni belgisiz. Arnaıy komıssııa jumys istep jatyr.
Saıótes aýyly aýmaǵyndaǵy «Tilemis» sharýa qojalyǵynyń jetekshisi Janaq Іzturǵanovtyń aıtýynsha, nóser jaýynnan keıin 17 jylqysyn óli kúıinde tapqan.
- Ólgen qulyndardy sanamaǵanda, iri 17 bas jylqym qyrylyp qaldy, - deıdi sharýa.
Al Saıótes aýylynyń turǵyny Bekmahanbet Istaletovtyń otyzdan astam jylqysy qyrylǵan. Sharýa qojalyǵynyń ıesi quzyrly organdar tarapynan kómek bolmaǵanyn, joǵalǵan malyn óz kúshterimen izdestirip jatqanyn aıtady.
- Jaǵdaı máz emes. Tabıǵattyń tosyn minezinen 30 dan astam jylqy qyryldy. Kómekke eshkim kelip jatqan joq. Jylqylarym túgel resmı tizimdi turǵan janýarlar. Temir joldyń eki jaǵyn tazartyp jatqan bolar. Biraq bizdiń sharýashylyq jaqqa eshkim kelgen joq. Sharýashylyǵym Saı-Ótes aýylynan kún shyǵysqa qaraı 21 shaqyrym jerde ornalasqan, - deıdi Bekmahanbet Istaletov.
Aıta keteıik, 14-15 sáýir kúnderi aımaqta ekpindi jel soǵyp, nóser jaýyn jaýǵan bolatyn. Saldarynan jylqylar batpaqqa batyp qyrylǵan. Osy jaǵdaıǵa baılanysty arnaıy komıssııa qurylyp, shalǵaıdaǵy aýyldardyń aýmaǵyn tekserý jumystary júrgizilip jatyr.
Oblystyq aýyl sharýashylyǵy basqarmasynyń málimetinshe, komıssııa jumysyn jalǵastyryp jatyr. Qorytyndysy áli shyqqan joq.
Buǵan deıin Mańǵystaýda nóser jaýynnan keıin júzden astam jylqy qyrylǵanyn jazǵan bolatynbyz.
