Mańǵystaýda naýqastyń ólimine sebepshi bolǵan «emshi» sottaldy
AQTAÝ. KAZINFORM — Mańǵystaý oblysynda halyq emin jasaý kezinde naýqastyń qaıtys bolýyna qatysty is boıynsha úkim qaıta qaraldy. Emdi qalalyq emhananyń medbıkesi jasaǵan. Apellıatsııalyq alqa buryn shyǵarylǵan úkimdi tym qatań dep taýyp, ony bas bostandyǵyn shekteý jazasyna aýystyrdy.
19 naýryzda Mýnaıly aýdandyq soty Mýnaıly aýdanynyń turǵynyn abaısyzda adam ólimine ákep soqtyrǵany úshin (QR QK 104-babynyń 1-bóligi) kináli dep tanydy. 49 jastaǵy áıel Aqtaý qalasyndaǵy № 1 qalalyq emhanada medbıke bolyp jumys isteıdi jáne tıisti bilimi men lıtsenzııasy bolmaǵanyna qaramastan, úıinde «halyq emin» jasaǵan. Sot málimetinshe, 2025 jylǵy 26 qarashada shamamen saǵat 20:30–da ol óz úıinde naýqasty «emdeý» barysynda onyń tamaǵyn qolymen qysyp, saldarynan er adam oqıǵa ornynda kóz jumǵan.
Sot oǵan 1 jyl 6 aı merzimge eń tómengi qaýipsizdik mekemesinde bas bostandyǵynan aıyrý jazasyn taǵaıyndady. Alaıda sottalǵan áıel kámeletke tolmaǵan balany tárbıelep otyrǵandyqtan, QR QK-niń 74-babyna sáıkes jazany óteý keıinge qaldyrylǵan.
Biraq qorǵaýshylar úkimmen kelispeı, apellıatsııalyq shaǵym túsirgen. Olar sottalǵan áıeldiń kinásin tolyq moıyndaǵanyn jáne jábirlenýshi taraptyń ony keshirgenin atap ótip, bas bostandyǵynan aıyrý jazasyn jeńil jazaǵa aýystyrýdy suraǵan.
Mańǵystaý oblystyq sotynyń qylmystyq ister jónindegi sot alqasy isti qarap, jaza taǵaıyndaý kezinde jeńildetetin mán-jaılar tolyq eskerilmegen degen qorytyndyǵa keldi. Qylmys jeńil dárejedegi sanatqa jatady, al bap sanktsııasynda balama jaza túrleri qarastyrylǵan.
Nátıjesinde apellıatsııalyq satyda áıelge 1 jyl 6 aı merzimge bas bostandyǵyn shekteý jazasy taǵaıyndalyp, probatsııalyq baqylaý belgilendi. Oǵan ýákiletti organdarǵa habarlamaı turǵylyqty jerin jáne jumys ornyn ózgertýge, oıyn-saýyq oryndary men alkogol tutynatyn jerlerge barýǵa, sondaı-aq túngi ýaqytta (22:00-den 06:00–ge deıin) úıden shyǵýǵa tyıym salyndy. Sonymen qatar, sot oǵan emshilikpen aınalysýǵa tyıym saldy.
Buǵan deıin, Aqtaýda teńiz jaǵalaýynda egeýquıryq qaptap ketkenin jazǵan bolatynbyz
