Mańǵystaýda nashaqorlar jıi qoldanatyn dári retseptsiz satylyp kelgen
AQTAÝ. KAZINFORM - Mańǵystaý oblysy prokýratýrasy dári-dármek pen medıtsınalyq maqsattaǵy buıymdardy satý kezinde zańnyń saqtalýyna taldaý júrgizdi.
Nátıjesinde tıisti lıtsenzııasysy joq dárihana qyzmetin júzege asyrý faktisi, sondaı-aq merzimi ótken dárini saqtaý jáne «Tropıkamıd» dárisin úlken kólemde (45 myńnan astam qaptama, bul oblys boıynsha 55%) retseptsiz satý derekteri anyqtaldy.
Tropıkamıd — adam ómiri men densaýlyǵyna zııandy áser etetin, esirtkini qoldanýdyń áserin kúsheıtetin, nashaqorlarǵa negizgi zattyń dozasyn únemdeýge nemese kúshti eıforııalyq reaktsııa alýǵa múmkindik beretin preparat.
Osyǵan oraı, oblys prokýratýrasynyń úılestirýimen Mańǵystaý oblysy boıynsha medıtsınalyq jáne farmatsevtıkalyq baqylaý departamenti dárihananyń qyzmetine tekseris júrgizdi.
Tekseris nátıjesimen dárihananyń ıesi ÁQBtK-niń 464-babynyń 1-bóligi jáne 426-babynyń 1, 3-bóligimen ákimshilik jaýapqa tartyldy.
Bul rette sot sheshimimen kásipkerdiń qyzmeti 3 aıǵa toqtatyldy.
