Mańǵystaýda munaı óndirýshi kompanııaǵa 350 mln teńge aıyppul salyndy
AQTAÝ. KAZINFORM – Mańǵystaýda Ekologııa departamentiniń Qaraturyn ken ornyndaǵy uńǵymadan shyqqan órt boıynsha «Bozashy Munaı» JShS-na qatysty jospardan tys tekserýi aıaqtaldy.
Ótken jyly 9 maýsymda ken ornyndaǵy №303 uńǵymada burǵylaý qubyryn kóterý kezinde oqys jaǵdaı bolyp órt shyqqan bolatyn. Al bul apattyń uzaqtyǵy 200 táýlikke sozylyp, tabıǵı gaz úzdiksiz janyp turǵan.
«Ekologııa departamentiniń mamandary atmosferalyq aýany lastaýshy zattardyń bar-joǵyna birneshe ret ólsheý jasady jáne onyń nátıjesi aýada metannyń shamadan tys mólsherin kórsetti. Byltyr 25 jeltoqsanda uńǵymadaǵy órt sóndirildi. Al qańtar aıynda Ekologııa departamenti jospardan tys tekserý júrgizip, ol ekologııalyq zańnama talaptarynyń buzylýyn anyqtady. Atmosferalyq aýadaǵy lastaýshy zattardyń shekti ruqsat etilgen kontsentratsııasynyń metan boıynsha 480 ese, munaı ónimderi boıynsha topyraqta 168,13 mg/kg artqany anyqtaldy», - dedi Ekologııa departamentiniń ókilderi.
Aıta ketetin jaıt, berilgen ruqsatqa sáıkes uńǵymany burǵylaý 2024 jyly bastalýy kerek bolǵan. Biraq 2023 jyldyń mamyrynda tıisti jumystar qolǵa alyndy.
Tekserý qorytyndysy boıynsha atalǵan kásiporynǵa keltirilgen ekologııalyq zalaldy joıý, sondaı-aq qorshaǵan ortaǵa emıssııalar normatıvterin saqtaý boıynsha remedıatsııa baǵdarlamasyn ázirleý qajettiligi týraly nusqama berilip otyr. Sondaı-aq, 4 ákimshilik hattama jasalyp, salynǵan aıyppul mólsheri – 350 mln teńge.
