Mańǵystaýda munaı kompanııasy qyzmetkerlerine 197 mln teńge qaryz bolyp shyqty

AQTAÝ. KAZINFORM – Aqtaý qalasynyń prokýratýrasy «Mangystau Oil Refining» JShS-de jalaqy tóleý zańnamasynyń saqtalýyna taldaý júrgizip, zańsyzdyqtardy áshkerelegen.

Mańǵystaý oblystyq prokýratýrasynyń málimetinshe, 2025 jyldyń qańtarynan naýryz aıyna deıin kásiporyn 241 qyzmetkerine jalaqy tólemegeni anyqtaldy. Jalpy bereshek somasy - 197 mıllıon teńgeni quraǵan. 

Qabyldanǵan prokýrorlyq qadaǵalaý sharalarynyń nátıjesinde, jumysshylardyń konstıtýtsııalyq quqyqtary qorǵalyp, olarǵa jalaqy tolyǵymen tólengen. 

- Jalaqy tóleýdi keshiktirgen zańdy tulǵa ákimshilik jaýapkershilikke tartyldy, - delingen habarlamada. 

Buǵan deıin, Mańǵystaý oblysynda 90 myń gektardan astam jer memleket menshigine qaıtarylǵan bolatyn.