Mańǵystaýda munaı-gaz kompanııasynyń laýazymdy basshylary sottaldy

AQTAÝ. KAZINFORM — Aqtaý qalalyq sotynda «Ózenmunaıgaz» AQ-na qarasty qurylym basshysy men servıstik kompanııa jetekshisine qatysty úkim shyqty.

Sotta senip tapsyrylǵan múlikti zańsyz ıemdenip, urlaǵany úshin aıyptalǵan «Aqtaý munaı servıstik kompanııasy» JShS-niń dırektory B. men «ÓzenMunaıGaz» AQ-nyń № 3 munaı-gaz óndirý basqarmasynyń dırektory S.-ǵa qatysty QK-tiń 189-babynyń 4-bóliginiń 2-tarmaǵymen qylmystyq is qaraldy.

Aqtaý qalalyq sotynyń baspasóz qyzmetiniń málimetinshe, birqatar jaıttar anyqtalyp otyr. Onyń ishinde 2018 jyldyń 31 mamyrynda «ÓzenMunaıGaz» AQ men «Aqtaý munaı servıstik kompanııasy» JShS-i arasynda 2021 jylǵy 31 jeltoqsanǵa deıin qoldanysta bolǵan uńǵymaǵa sorǵyny qysý qubyryn elektrtsentrıfýgalyq sorǵyny ornatýǵa arnalǵan tolyq jabdyqty jalǵa alý boıynsha qyzmetter kórsetýge kelisim jasalǵan.

Biraq shyǵynǵa ushyraǵysy kelmegen servıstik kompanııanyń basshysy B. shart talaptaryn buzyp, sorǵyny qysý qubyryn satyp almaǵany belgili boldy.

«Kúdikti B. onyń ornyna 2020 jylǵy qańtarda jaldamaly sebepterden, sondaı-aq, shart talaptaryn buzý derekterin jasyrý jáne tapsyrys berýshiniń «Aqtaý munaı servıstik kompanııasy» JShS-ǵa aıyppul salýyna jol bermeý maqsatynda tapsyrys berýshige tıesili sorǵyny qysý qubyryn paıdalaný jáne jabdyqtardy jalǵa alý úshin negizsiz tólem alý arqyly «ÓzenMunaıGaz» AQ qarajatyn urlaýǵa baǵyttalǵan qylmystyq jolǵa barǵan. Jeke múddesin kózdegen kúdikti B. «Aqtaý munaı servıstik kompanııasy» JShS Jańaózen fılıalynyń dırektory I. arqyly № 3 munaı-gaz óndirý basqarmasynyń dırektory S.-dan sorǵyny qysý qubyrynyń qajetti kólemin «Aqtaý munaı servıstik kompanııasy» JShS-ge bosatýǵa kelisim alǵan», — dep jazylǵan sottyń habarlamasynda.

Sondaı-aq, aıyptalýshylar B. jáne S-nyń birlesken zańsyz is-áreketteriniń boıynsha 2020-2021 jyldar aralyǵynda «Ózenmunaıgaz» AQ «Aqtaý munaı servıstik kompanııasy» JShS-ge 108,4 mln. teńge somasynda 2308 dana sorǵyny qysý qubyrynyń qarjysy men olardy jalǵa alý úshin 21,7 mln. teńge somasyn ustap qalmaı, tolyq tólem jasaǵan.

«Osylaısha, B.-nyń zańsyz ıemdený arqyly urlap, óz qalaýy boıynsha kádege jaratýy nátıjesinde, «ÓzenMunaıGaz» AQ atynan memleketke 130 108 118 mln. teńge kóleminde asa úlken kólemde shyǵyn keldi. S. jáne B. ortaq múddege saı áreket ete otyryp, «Aqtaý munaı servıstik kompanııasy» JShS-niń «ÓzenMunaıGaz» AQ-ǵa tıesili sorǵyny qysý qubyryn paıdalanǵanyn bile tura, tıisinshe sorǵyny qysý qubyryn jalǵa alý somasy men olardyń quny shart somasynan alyp tastap, ádeıi qandaı da bir sharalar men is-áreketter jasamaı, usynylǵan jumystar týraly aktilerge tolyq qunyna qol qoıǵan», — dep málimdedi qalalyq sottyń baspasóz qyzmeti.

Osynyń negizinde kúdikti S. «ÓzenMunaıGaz» AQ-na 130 108 118 mln. teńge kólemde materıaldyq zalal keltirgeni belgili boldy.

Sot barysynda prokýror eki kúdiktini kináli retinde tanyp, olardyń árqaısysyn 10 jyl merzimge bas bostandyǵynan aıyrýdy surady. Jábirlenýshiniń ókili prokýrordyń suranysyna qoldaý bildirdi. Degenmen sotta B. kinásin moıyndaýdan bas tartyp, aqtaý úkimin shyǵarýdy surady. Al ekinshi kúdikti S. kinásin ishinara moıyndap, bas bostandyǵynan aıyrmaıtyn jaza taǵaıyndaýdy alǵa tartty. Sottalýshylardyń kinási tıisti materıaldarmen dáleldenip otyr.

«Sot úkimimen S. QK-tiń 189-babynyń 4-bóliginiń 2-tarmaǵymen kináli dep tanyp, ony belgili bir laýazymdardy atqarý nemese belgili bir qyzmetpen aınalysý quqyǵynan on jylǵa deıingi merzimge aıyra otyryp, oǵan 8 jylǵa bas bostandyǵynan aıyrý jazasy taǵaıyndaldy. Al B-ǵa munaı-gaz salasy salasyndaǵy kommertsııalyq uıymdarda basshy laýazymdardy atqarý quqyǵynan 10 jyl merzimge aıyryp, oǵan 8 jylǵa bas bostandyǵynan aıyrý úkimi shyǵaryldy», — dep jazylǵan sottyń habarlamasynda.

Budan bólek «Ózenmunaıgaz» AQ-nyń azamattyq talap qoıýy qanaǵattandyrylyp, sottalǵan B. men S-dan kompanııa paıdasyna 130 108 118 mln. teńge óndirildi.

Ázirge qalalyq sottyń úkimi zańdy kúshine engen joq.