Mańǵystaýda múgedektigi eskerilmeı, 10 táýlikke qamalǵan azamattyń jazasy ózgertildi
ASTANA. KAZINFORM — Mańǵystaý oblysy Qaraqııa aýdanynda II toptaǵy múgedektigi bar azamatqa taǵaıyndalǵan 10 táýlik ákimshilik qamaý jazasy aıyppulǵa aýystyryldy. Buǵan prokýratýranyń narazylyǵy negiz bolǵan.
Aýdandyq sot «K» esimdi azamatty ákimshilik quqyq buzýshylyq jasaǵany úshin 10 táýlikke qamaý týraly sheshim shyǵarǵan.
Alaıda aýdan prokýratýrasy is materıaldaryn zerdeleý kezinde azamattyń II toptaǵy múgedektigi bar ekenin anyqtady.
Qoldanystaǵy zańnama boıynsha I jáne II toptaǵy múgedektigi bar adamdarǵa ákimshilik qamaý jazasy qoldanylmaıdy.
Osyǵan baılanysty prokýratýra sot qaýlysyna narazylyq bildirdi. Oblystyq sot narazylyqty qanaǵattandyryp, ákimshilik qamaý jazasynyń kúshin joıdy. Onyń ornyna azamatqa aıyppul salyndy.
Eske salaıyq, buǵan deıin eki balasy bar áıelge berilgen 20 táýlik qamaý jazasy aıyppulǵa aýystyrylǵanyn habarlaǵanbyz.
