Mańǵystaýda myńnan asa adam qyzylshamen aýyrǵan
Mańǵystaý oblysynda bıyl qyzylsha aýrýyna 2 myńnan asa kúdikti jaǵdaı tirkeldi. Onyń ishinde 1096 jaǵdaı dáleldengen. Bul týraly Mańǵystaý oblystyq sanıtarııalyq-epıdemıologııalyq baqylaý departamenti basshysynyń orynbasary Berdibek Saraltaev málim etti, dep habarlaıdy Kazinform.
16 qarashaǵa deıin Aqtaý qalasynda — 444, Jańaózende — 892, Túpqaraǵanda — 78, Mańǵystaý aýdanynda — 67, Qaraqııa aýdanynda — 147, Munaılyda — 440, Beıneýde 14 naýqas tirkelgen.
«Jalpy oblys kóleminde qyzylshanyń 2082 kúdikti jaǵdaıynyń oshaǵynda epıdemııaǵa qarsy is-sharalar júrgizilip jatyr. Naqtylanǵan 1096 jaǵdaıdyń jas boıynsha taldaýynda 1 jasqa deıin 181 bala (16,5%), 1 — 14 jas aralyǵynda — 726 (66,2%), 15-18 jas — 28 (2,5%), 19 jas jáne odan joǵary 161(14,6%) jaǵdaı tirkeldi. Oblys kóleminde 1 jastaǵy balalardyń egýmen qamtylý deńgeıi — 85%, al 6 jastaǵy balalarda bul kórsetkish 87,7% qurady.
Qosymsha jappaı ımmýndaý boıynsha oblysta egilýge josparlanǵan kontıngentter sany — 55 029. Atap aıtqanda, 6 aı — 10 aı 29 kúnge deıingi balalar sany — 14 300. 2 jastan 4 jas 11 aı 29 kúnge deıingi balalar sany — 36 950, onyń ishinde 2 jastaǵy — 4 869, 3 jastaǵy — 16 845, 4 jastaǵy — 15 236 bala. Al 55 jasqa deıingi medıtsına qyzmetkerleriniń sany — 3779», — dedi Berdibek Saraltaev.
Sondaı-aq oblys kólemindegi aýrýhanalardyń juqpaly bólimderinde 118 naýqas, olardyń 84-i bala, 34-i eresek, onyń ishinde — 8 júkti áıel jatqan.
«Qyzylsha aýrýy óte jyldam, aýa tamshy jolymen taralatyn paramıksovırýspen shaqyrylatyn, teride bórtpelerdiń shyǵýymen sıpattalatyn juqpaly aýrý. Negizinen ekpemen qamtylmaǵan nemese aǵzada qajetti ımmýnıtet qalyptaspaǵandarda aýrýshańdyq damıdy.
Aýrýǵa qarsy ekpe almaǵan jandar da bul aýrýdyn zardabyn shegedi, negizi mı jasýshalarynyń qabynýy — entsefalıtpen asqynady. Aýyrǵan adamnyń dene qyzýy kóteriledi, álsireıdi, bas aýryp, uıqysy qashady, qurǵaq jótel bastalyp, 3-8 kúnge deıin bórtpeler shyǵa bastaıdy. Bórtpeler qan tamyrlarynyń jarylýynan paıda bolady. Bórtpeler deneniń joǵarǵy jaǵynan tómen qaraı tógilip shyǵady. Turǵyndardy ekpe alýǵa jáne saqtyq sharalaryn saqtaýǵa shaqyramyn», — dedi Mańǵystaý oblystyq densaýlyq saqtaý basqarmasy basshysynyń orynbasary Bıbizada Dúısenbaeva.
