Mańǵystaýda memlekettik shekaradan zańsyz ótpek bolǵan 5 shetel azamaty ustaldy
AQTAÝ. KAZINFORM – Mańǵystaýda memlekettik shekaradan zańsyz ótpek bolǵan 5 shetel azamaty ustaldy. Buldan bólek QR Ulttyq qaýipsizdik komıtetiniń Shekara qyzmeti jyl basynan beri teńizden 300 shaqyrym aý shyǵaryp, 2 myńnan astam bekireni qutqarǵan.
Búginde UQK shekara qyzmetinde 50-den astam karabl men kater bar. Memlekettik shekaranyń kúzetinde eldiń naǵyz patrıot azamattary tur. Buǵan óńir jýrnalısteri kóz jetkizdi. BAQ ókilderine arnalǵan baspasóz týry aıasynda, jýrnalıster UQK Shekara qyzmetiniń Mańǵystaý oblysy boıynsha departamenti jaǵalaý kúzeti ekinshi bólimshesiniń shekaralyq kemeleri men katerlerin aralady. Teńiz shekarashylary «Semser» kemesine ekskýrsııa jasap, memlekettik shekarany qorǵaýda qoldanylatyn qarý-jaraq pen arnaıy tehnıkany tanystyrdy. Sonymen qatar, Kaspıı teńizinde shekara buzýshylardy ustaý boıynsha oqý-jattyǵý epızody kórsetildi.
Aıta keteıik, QR Ulttyq qaýipsizdik komıteti BAQ qyzmetkerleri kúni qarsańynda, respýblıkalyq jáne óńirlik BAQ ókilderiniń baspasóz týryn uıymdastyrdy. Onyń aıasynda jýrnalıster UQK «A» arnaıy jasaq qyzmetiniń oqý-jattyǵý polıgonynda bolyp, shekara vedomstvolarynyń jumysymen tanysty. Bul týraly buǵan deıin jazǵan bolatynbyz.
