Mańǵystaýda Memleket basshysynyń tapsyrmalaryn iske asyrý boıynsha keńes ótti
ASTANA. KAZINFORM – 3 mamyr, senbi kúni Mańǵystaý oblysynyń ákimi Nurdáýlet Qılybaı Memleket basshysy Qasym-Jomart Toqaevtyń óńirge jasaǵan jumys sapary aıasynda bergen tapsyrmalaryn oryndaý boıynsha keńes ótkizdi.
Mańǵystaý oblysy ákimi baspasóz qyzmetiniń habarlaýynsha, jıyn barysynda oblystyń áleýmettik-ekonomıkalyq damýyna qatysty tapsyrmalardyń oryndalý barysy saralanyp, jaýapty sala basshylary naqty baǵyttar boıynsha esep berdi.
Sáýirdiń 18-kúni óńirdiń tynys-tirshiligimen tanysyp, strategııalyq mańyzdy jobalar boıynsha keńes ótkizgen Prezıdent Mańǵystaý halqynyń ál-aýqatyn arttyrý men ınfraqurylymdy jetildirýge baǵyttalǵan birqatar tapsyrma júktegen bolatyn. Bul mindetter búginde barlyq deńgeıdegi atqarýshy organdardyń kún tártibinde.
Keńeste sóz alǵan oblystyq jolaýshylar kóligi jáne avtomobıl joldary basqarmasynyń basshysy Adaıbek Qalıevtiń aıtýynsha, basqarmaǵa segiz tapsyrmany oryndaý júktelgen. Sonyń ishinde 2026 jyldyń sońyna deıin Quryq portynyń ınfraqurylymyn jańǵyrtý, kemeler sanyn kóbeıtý jáne Jańaózen qalasynan Túrikmenstan shekarasyna deıingi, Kenderli kýrorttyq aımaǵy arqyly ótetin avtojol ýchaskelerin jóndeý jobasyn iske asyrý josparlanǵan. Jaqynda ǵana 7 000 tonna júk kóteretin «Nasipkali Marabayev» kemesi sýǵa túsirildi. Sonymen qatar Quryqtaǵy «Sarja» termınalynyń qurylysy jalǵasyp jatyr.
Temirjol salasynda Mańǵystaý, Beıneý jáne Shetpe vokzaldaryn jańǵyrtý jumystary júrgizilý ústinde. Bul joba jyl sońyna deıin aıaqtalady.
Jol ınfraqurylymyn jetildirý maqsatynda uzyndyǵy 164 shaqyrym bolatyn «Jańaózen – Kenderli – Túrikmenstan shekarasy» avtojolyn jóndeý jumystary bastalady.
Oblystyq týrızm basqarmasynyń basshysy Ersin Ibrashev Memleket basshysynyń tapsyrmalaryna sáıkes júrgizilip jatqan jumystardy atap ótti.
Sondaı-aq sý resýrstary jáne ırrıgatsııa basqarmasy basshysynyń mindetin atqarýshy Ánýar Týlıakov baıandamasynda «Kendirli» kýrorttyq aımaǵyndaǵy sý tuşytý zaýytynyń qurylysyn 2025 jyldyń 31 mamyryna deıin aıaqtaý josparlanyp otyrǵanyn málimdedi.
Aqtaýdaǵy «Kaspıı» sý tuşytý zaýytynyń qýatyn táýligine 100 myń tekshe metrge deıin arttyrý baǵytynda úshinshi kezeńi iske asyrylyp jatyr.
Al oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Berdibek Qartbaev eseptik jylý qýaty 360 Gkal/saǵatty quraıtyn «Aqtaý qalasyndaǵy 19a, 20, 20a, 33, 34a, 35 jańa shaǵyn aýdandardy jylýmen jabdyqtaý úshin qazandyq alańynan tys ınjenerlik jeliler salý» jobasynyń oryndalý barysy jóninde baıandady.
Sonymen qatar ol Mańǵystaý oblysy men kórshiles óńirlerdi elektr qýatymen turaqty qamtamasyz etý maqsatynda «MAEK» JShS júzege asyryp jatqan «JES №1, 2, 3 energobloktaryn jańǵyrtý» jobasyna da toqtaldy.
Jıynda Nurdáýlet Qılybaı aldaǵy kezeńdegi jumystyń basty baǵyty oblys halqynyń turmys sapasyn jaqsartý men ekonomıkanyń ósýin qamtamasyz etý ekenin atap ótti. Sonymen qatar ol Prezıdent tapsyrmalarynyń ýaqtyly iske asyrylýyn qamtamasyz etip, árbir baǵyt boıynsha naqty nátıje qajet ekenin aıtty.
– Memleket basshysy Qasym-Jomart Toqaev Mańǵystaýǵa erekshe kóńil bólip, turǵyndardyń jaıly ómir súrýine qajetti jaǵdaı jasaý úshin Úkimet pen oblys ákimdigine naqty mindetter júktedi. Búgingi keńeste aıtylǵan máseleniń barlyǵy Prezıdenttiń tikeleı baqylaýynda tur. Ár tapsyrma ýaqytyly, naqty ári sapaly oryndalýy tıis. Jaýapty qyzmetkerler jumysqa joǵary jaýapkershilikpen qarańyzdar, - dedi Nurdáýlet Qılybaı.
Eske sala keteıik, buǵan deıin Aqtaýda «Taza Qazaqstan» aktsııasy aıasynda senbilik ótkenin jazǵan edik.