Mańǵystaýda medıtsına mamandary tapshy
Mańǵystaý oblysynda 200-ge jýyq medıtsına mamany jetispeıdi. Aqtaý men Jańaózen qalalaryna 130-daı kadr kerek bolsa, aýyldarda 77 maman kerek, dep habarlaıdy Kazinform.
Óńirge anestezıolog-reanımotolog, akýsher-gınekolog, hırýrg, onkolog, endokrınolog mamandar qajet. Bıyl kadr tapshylyǵyn joıý úshin oblys ákiminiń 200-ge jýyq granty bólindi. Onyń 68-i bakalavrǵa, 97-si ınternatýraǵa, 33-i rezıdentýraǵa arnalǵan. Sonymen qatar densaýlyq saqtaý mınıstrligi rezıdentýra mamandaryn daıyndaý úshin Mańǵystaýǵa 79 grant bóldi. Mamandar máseleniń túbegeıli sheshilýine jastardyń bilim alýǵa jumsaıtyn ýaqyttyń áser etetin aıtady.
- Bir jaqsy mamandy daıyndaý úshin medıtsına qyzmetkerine 12 jyldaı ýaqyt ketedi. Negizgi 6 jyl, odan keıin 3 jyl rezıdentýra oqıdy. Rezıdentýradan kelgennen keıin, biz onyń biliktiligin arttyrýymyz kerek. Osyndaı dárigerlerge júktemeni azaıtý maqsatynda biz orta býyn medıtsına qyzmetkerleriniń de biliktiligin arttyrýymyz kerek. Sol kezde tepe-teńdik bolady», - dedi Mańǵystaý oblystyq densaýlyq saqtaý basqarmasy basshysynyń orynbasary Bıbizada Áshimqyzy.
Qazir oblys boıynsha 93 mamandy jumysqa qabyldaý máselesi qaralyp jatyr.
Aıta keteıik, jas mamandarǵa bir jolǵy áleýmettik kómek kórsetý úshin jergilikti bıýdjetten 70 mln teńge bólindi. Sondaı-aq, Aqtaý, Jańaózen, Munaıly aýdanyna barlyǵy 7 páter satyp alyndy. Jyl saıyn «Dıplommen aýylǵa» baǵdarlamasy aıasynda aýdandyq ákimdikter tarapynan baspana alýǵa 1500 aılyq eseptik kórsetkish kóleminde nesıe jáne 100 aılyq eseptik kórsetkish kóleminde kóterme qarajat beriledi. Oǵan qosa, eldi mekenderge keletin dárigerlerge 1 mln 500 myń teńge kóleminde bir rettik kómek berý josparlanyp otyr.
