Mańǵystaýda mas kúıinde qaıta kólik júrgizgen er adam túrmege qamaldy
ASTANA. KAZINFORM – Mańǵystaý aýdanynda alkogoldik masań kúıde kólik tizgindep, kólik júrgizý quqyǵynan aıyrylǵanyna qaramastan qaıtadan rólge otyrǵan er adamǵa qatysty sot úkimi shyqty.
Mańǵystaý aýdandyq prokýratýrasynyń málimetinshe, azamat N. bıylǵy naýryz aıynda alkogoldik masań kúıde kólik basqarǵany úshin Ákimshilik quqyq buzýshylyq týraly kodekstiń 608-baby boıynsha jaýapkershilikke tartylǵan.
- Sot sheshimimen oǵan 15 táýlik ákimshilik qamaq jazasy taǵaıyndalyp, 7 jyl merzimge kólik quralyn basqarý quqyǵynan aıyrylǵan.
Alaıda belgilengen tyıymǵa qaramastan, mamyr aıynyń sońynda ol taǵy da alkogoldik masań kúıde kólik basqarǵan, - delingen aqparatta.
Osy derek boıynsha Qylmystyq kodekstiń 346-baby boıynsha sotqa deıingi tergep-tekserý bastaldy.
Mańǵystaý aýdandyq sotynyń úkimimen azamat N. kináli dep tanylyp, 1 jylǵa bas bostandyǵynan aıyryldy. Sonymen qatar ol ómir boıyna kólik quralyn basqarý quqyǵynan aıyryldy.
Sottalýshy sot zalynda qamaýǵa alyndy.
Aıta keteıik, buǵan deıin mas kúıde avtobýs júrgizgenderge qatysty qylmystyq is qozǵaldy.
