Mańǵystaýda mas kúıde kólik júrgizgen turǵyn 20 táýlikke qamaldy
AQTAÝ. KAZINFORM — Mańǵystaý aýdanynda kólik júrgizý quqyǵy joq bola tura, mas kúıde rólge otyrǵan azamat 20 táýlikke ákimshilik qamaqqa alyndy.
Mańǵystaý aýdandyq sotynyń baspasóz qyzmetiniń málimetinshe, is QR Ákimshilik quqyqbuzýshylyq týraly kodeksiniń 608-babynyń 6-bóligi boıynsha qaralǵan.
Sot anyqtaǵandaı, 2026 jylǵy 21 mamyrda Shaıyr aýylynyń turǵyny kólik quralyn basqarý quqyǵy bolmaǵanyna qaramastan, «Chevrolet Cobalt» markaly avtokólikti ishimdik iship basqarǵan.
Quqyqbuzýshynyń kinási óziniń túsiniktemesimen, ákimshilik quqyqbuzýshylyq týraly hattamamen, medıtsınalyq kýálandyrý qorytyndysymen jáne is materıaldarymen dáleldengen.
— Atalǵan baptyń sanktsııasyna sáıkes, mundaı quqyqbuzýshylyq úshin 20 táýlikke ákimshilik qamaq jazasy kózdelgen. Sot qaýlysymen turǵyn ákimshilik quqyqbuzýshylyq jasaǵany úshin kináli dep tanylyp, oǵan 20 táýlik merzimge ákimshilik qamaq jazasy taǵaıyndaldy. Sot qaýlysy zańdy kúshine endi, — delingen habarlamada.
Buǵan deıin, Pavlodar oblysynda mas kúıde jol apatyn jasaǵan áıel qamaýǵa alynǵan bolatyn.
