Mańǵystaýda kúıeýi pyshaqtaǵan áıeldiń aıaǵy aýyr bolyp shyqty

AQTAÝ. KAZINFORM – Denesiniń birneshe jerinde jaraqaty bar 2000 jyly týǵan áıel oblystyq kópbeıindi aýrýhananyń qabyldaý bólimine 13-shilde kúni túnde saǵat 22:40 shamasynda jetkizilgen. Mańǵystaý oblystyq kópbeıindi aýrýhanasy baspasóz qyzmetiniń habarlaýynsha, naýqasty kezekshi hırýrg, travmatolog pen reanımatolog dárigerler tekserip, zerthanalyq analızderin qarap, shuǵyl túrde operatsııa jasaǵan.

- Naýqastyń dıafragma men baýyry, ishki qabyrǵalary, ókpe tinderi zaqymdalǵan. Qol-aıaqtyń joǵarǵy jáne tómengi bóligi birneshe ret pyshaqtalǵan. Naýqastyń aıaǵy aýyr, júktiligi - 10 apta.

Qazir naýqastyń jaǵdaıy - turaqty aýyr. Esin biledi. Gemodınamıkasy turaqty. Jansaqtaý bóliminde emdelip jatyr, - deıdi aýrýhananyń baspasóz hatshysy Juldyz Qalıeva. 

Eske salaıyq, áleýmettik jelide er adamnyń áıelin pyshaqtaǵany týraly beınejazba taraǵan bolatyn. 

Oqıǵa Munaıly aýdany Mańǵystaý aýylyndaǵy sýpermarketterdiń biriniń aldynda bolǵan. 

Polıtsııa kúdiktiniń ustalyp, qamaýǵa alynǵanyn habarlady. Sondaı-aq kisi óltirýge oqtalý faktisi boıynsha qylmystyq is qozǵalǵan. 

Al basqa aqparat tergeý múddesi úshin jarııa etilmeıdi.