Mańǵystaýda qutyrý aýrýynan kóz jumǵan áıelge qatysty tyń derek shyqty

AQTAÝ. KAZINFORM — Oblystyq sanıtarııalyq — epıdemııalogııalyq departamenti basshysynyń orynbasary Gúlnar Kórkenbaevanyń aıtýynsha, oqıǵa qyrkúıek aıynda bolǵan. Beıneý aýdany Beıneý aýylynyń turǵyny, 43 jastaǵy áıel aýdandyq aýrýhanaǵa 23 qyrkúıekte jatqyzylǵan. Tekserýler nátıjesinde naýqasqa «qutyrý» dıagnozy qoıylǵan. Ókinishke oraı, áıel 3 kúnnen soń, atalǵan dertten kóz jumǵan.

— Naýqasty tamyz aıynda belgisiz, jabaıy mysyq dalada jatqanda mańdaıynan tistep alǵan. Sony der kezinde, ýaqytyly medıtsınalyq kómekke júginbegen. Bul — qutyrma aýrýynyń emi joq. Turǵyndarǵa aıtarymyz, eger de belgisiz janýar tistep alǵan, silekeıi juqqan, tyrnap alǵan, ýynan zardap shekken jaǵdaıda der kezinde antırabıkalyq kómekti alý úshin medıtsınaǵa júginý qajet, — deıdi Gúlnar Kórkenbaeva. 

Osy oqıǵadan keıin, Beıneý aýdandyq veterınarııa stantsııasynyń qyzmetkerleri Beıneý aýylyndaǵy barlyq janýardy tekserip, baqylaý jumystaryn júrgizgen. Nátıjesinde aýrý nemese kúdik týdyratyn janýarlar anyqtalmaǵan.

Aıta keteıik, Mańǵystaýda buǵan deıin qutyrý aýrýy 2004 jyly Jańaózen qalasynda tirkelgen. 

Buǵan deıin, mysyq tistegen mańǵystaýlyq turǵynnyń qutyrma aýrýynan kóz jumǵanyn jazǵan bolatynbyz.