Mańǵystaýda qustardy qorǵaý jobasynan shý shyqty
AQTÓBE. KAZINFORM — Bloger Azamat Sársenbaev qustardy qorǵaý jumystaryna 10 mln teńge bólingenin kezdeısoq bilip, shý shyǵardy. Al tapsyrys berýshi Mańǵystaý oblystyq tabıǵı resýrstar jáne tabıǵatty paıdalanýdy retteý basqarmasy jumysty durys oryndamaǵan qoǵamdyq qorǵa eki ret eskertý berdi.
Qoǵam belsendisi, bloger Azamat Sársenbaev kópshilikke tabıǵat janashyry retinde de tanys. Mańǵystaýdyń ásem kórinisterin túsirip, áleýmettik jeli arqyly tanystyryp otyrady. Onyń aıtýynsha, dál osy jumystaryn kórgen «Qazaqstannyń ekologııalyq qory» qoǵamdyq qory ózimen baılanysqa shyqqan. Tipti granttar utatynyn, qoldaýǵa daıyn ekenin jetkizgen. Birge jumys isteýge usynys bergen.
— Meniń janymda qustardyń tilin biletin ornıtolog maman bar. Maǵan emes, aqshany soǵan berer edim. Al men aqparattyq qoldaý kórsetsem boldy. Sebebi adamdar meni tanyǵan soń jaralanǵan, qanaty qaıyrylǵan qustar týraly aıtyp, ákeledi. Dál osy sózdi birge jumys isteıdi dep qabyldaǵan sııaqty. Arada naqty kelisim bolmady. Bir kúni maǵan Qyzyl kitapqa engen qusty ákeldi. Búrkitti arnaıy orynǵa aparý úshin Mańǵystaý oblystyq tabıǵı resýrstar jáne tabıǵatty paıdalanýdy retteý basqarmasynan ruqsat almaq boldyq. Baryp, kelisim alǵan kezde basqarma mamandarynyń biri arnaıy grant bólingenin, qarjy 10 mln teńge ekenin aıtty. Tipti jobanyń osy jolmen jaqsy jumys istep jatqanyn jetkizgende qatty tańqaldym. Sebebi qoǵamdyq qor solaı esep bergen. Shyn máninde qoǵamdyq qor bizdiń foto, vıdeo qujattarymyzdy alyp, bar bolǵany 500 myń teńge beretinin bilgende basqarma mamandary da oılanyp qaldy. Sońy shýǵa ulasty. Qoǵamdyq qor bizdiń atymyzdy jamylyp osylaı tabys tapqysy keldi, — dedi bloger Azamat Sársenbaev.
Onyń aıtýynsha, tabıǵatty qorǵaý sharalarynyń bári tegin ári janashyr nıetpen jasalǵan. Al qor torǵaıǵa kómek kórsetip te aqsha almaq bolǵan. Tipti kelisimshart talaptary oryndalmaǵan. Talap boıynsha ońaltý ortalyǵy da bolýy tıis.
— Qujatta 10 mln teńgeniń teń jartysy jalaqyǵa jumsalǵany jazylǵan. Sonymen birge 1,8 mln teńge aqparattyq paraqshalar shyǵarý úshin, 2 mln teńge «Qoqıqaz kúni» festıvalin uıymdastyrýǵa dep qarastyrylǵan. Al 1 mln teńgege balalarǵa ekskýrsııa jasaýy tıis. Bul sharalar uıymdastyrylmaǵan. Al 500 myń teńgeni bizge, ıaǵnı qustarǵa kómekke dep qarastyrǵan. Bul qor endi grant almaýy kerek. Qor josyqsyz qatysýshy dep tanylýy tıis, — dedi Azamat Sársenbaev.
Al Mańǵystaý oblystyq tabıǵı resýrstar jáne tabıǵatty paıdalanýdy retteý basqarmasy tapsyrysty oryndaýy tıis qoǵamdyq qor jumysyna kóńili tolmaıtynyn, eki ret eskertý bergenin habarlady.
— Óńirde kezdesetin jabaıy qustardy saqtaý jáne ýaqytyly kómek kórsetý úshin memlekettik grant bólinip, 10 mln teńge qaraldy. Onyń ishinde álsiregen jáne jaralanǵan jabaıy qustardy ońaltý ortalyǵyn uıymdastyrý, ýaqytsha ustaý ornyn jasaqtaý, veterınarlyq qyzmet bolýy tıis. Qustardy qorektendirý, tabıǵı ortaǵa jiberý kerek. Sonymen birge Qarakól kóline 20 ret ekskýrsııa jasaý, Halyqaralyq qoqıqaz kúni festıvalin uıymdastyrý kirdi. Festıval aıasynda 5 nomınatsııa boıynsha konkýrs ótkizý talaby da qoıyldy. Osy jumystar tolyǵymen oryndalmady. Tek aqparattyq paraqshalar taratylǵanyn aıtqan, — dedi Mańǵystaý oblystyq tabıǵı resýrstar jáne tabıǵatty paıdalanýdy retteý basqarmasy bóliminiń basshysy Jazıra Ádilbekova.
Basqarma Azamattyq bastamalardy qoldaý ortalyǵy arqyly kelisimshartqa otyrady. Memlekettik satyp alý kezinde sybaılas jemqorlyqqa jol bermeý úshin ortada operator jumys isteıdi. Bul jaǵdaıda da operator konkýrs jarııalap, ÚEU-men kelisimmen qol qoıdy.
— Tamyz aıynda qandaı jumys atqarylyp jatqanyn surap, operatorǵa hat joldandy. Bul ekinshi hat. Aldymen baqylaý jasaý týraly aıtyp, keıin naqty jumysty talap ettik. Eki ret hatqa jaýap bolmaǵan soń oryndalmaǵan jumystyń qarjysyn qaıtarý týraly hat jazyldy. Áli jaýap kelmedi. Eger talap oryndalmasa sotqa júginemiz, — dedi Jazıra Ádilbekova.
Al «Qazaqstannyń ekologııalyq qory» qoǵamdyq qory ázirge qandaı da bir baılanysqa shyqpady. Qordyń Astanadaǵy baılanys telefony da jaýap bermedi.
Aıta keteıik, shildede Aqtaýda teńiz jaǵalaýynan ıtbalyq óleksesi tabyldy. Teńiz janýarynyń óleksesin sýǵa shomylyp júrgen eresekter men balalar baıqaǵan.