Mańǵystaýda kúshti áseri bar preparattardy ruqsatsyz satqan dárihanashylar ustaldy

AQTAÝ. KAZINFORM – 16 shilde kúni Munaıly aýdanynyń Atameken aýylynda esirtki qylmystaryna qarsy kúres basqarmasy qyzmetkerleri retseptsiz, zańsyz túrde kúshti áser etetin dárilerdi satyp jatqan dárihanany anyqtaǵan.

Jedel-izdestirý sharalary barysynda dárihanashylar men tyıym salynǵan preparattardy satyp alǵan 3 turǵyn ustaldy.

Dárihana ishinen 150 dana ALIS (Pregabalın) jáne 48 quty Tropıkamıd preparaty tabylyp, tárkilengen. Bul dárilik zattar nashaqorlar jıi qoldanatyn preparattarǵa jatady.

Dárihana qyzmetkerleri bul dárilerdiń retseptsiz, nashaqorlarǵa satý úshin daıyndalǵanyn aıtqan.

Al, dárihananyń farmatsevtıkalyq qyzmetke lıtsenzııasy bar ekeni anyqtaldy.

- Atalǵan derek QR Qylmystyq kodekstiń 296-babynyń 2-bóligi boıynsha tirkeldi. Qazirge ýaqytta sotqa deıingi tergeý amaldary júrgizilýde. Sonymen qatar, dárihananyń búkil qyzmetine tekseris taǵaıyndaldy. Materıaldar jaýapty tulǵalardy jaýapkershilikke tartý úshin medıtsınalyq jáne farmatsevtıkalyq baqylaý departamentine joldandy, - delingen habarlamada. 

Buǵan deıin, Astanada esirtki jarnamasyn taratqan áıel sottalǵan edi.