Mańǵystaýda qurylysshy altynshy qabattan qulap qaza tapty

ASTANA. KAZINFORM — Mańǵystaý oblysynda Munaıly aýdany aýmaǵyndaǵy qurylys nysandarynyń birinde 20 jastaǵy jumysshy lıfti shahtasyna qulap qaza tapty. Bul týraly Memlekettik eńbek ınspektsııasy komıtetiniń Mańǵystaý oblysy boıynsha departamenti habarlady.

Departament derekterine sáıkes, bıyl 4 qarasha kúni kranmen qum toly naýany joǵary qabatqa jetkizgen kezde boldy. Qumdy túsirip bolǵan soń, jumysshy qaýipsizdik ornynan alystap ketpekshi bolǵanda tepe‑teńdigin joǵaltyp, lıfti shahtasyna qulap ketken. Jedel járdem brıgadasy shamamen 20–30 mınýttan soń kelse de, jas jigit alǵan jaraqattarynan qaıtys bolǵan.

Vedomstvo ókiliniń aıtýynsha, jumys berýshi — JK «Sarıev S. J» jáne tapsyrys berýshi «AN-GroupM» JShS atalǵan qaıǵyly jaǵdaı týraly aýmaqtyq eńbek ınspektsııasyna ýaqytyly habarlaǵan joq. Bul QR zańnamasyna qaıshy keledi.

— Qazir oblystyq eńbek ınspektsııasy komıssııasyn qurǵan. Mamandar apat sebebin, qaýipsizdik talaptarynyń saqtalýyn jáne jaýapty tulǵalardyń múmkin boldyrǵan qatelikterin anyqtap jatyr. Tergeý aıaqtalǵan soń qosymsha resmı aqparat beriledi, — Mańǵystaý oblysy boıynsha memlekettik eńbek ınspektsııasy Departamentiniń eńbek qaýipsizdigi jáne eńbekti qorǵaýdy baqylaý bóliminiń basshysy Baýyrjan Kemalov.

Eske salsaq, Astanada jóndeý kezinde lıft qulap, bir jumysshy kóz jumǵan edi.