Mańǵystaýda Quryq-Jetibaı tas joly bıyl paıdalanýǵa beriledi

AQTAÝ. KAZINFORM — Respýblıkalyq mańyzy bar 60 shaqyrymdyq joldyń qurylysy budan 4 jyl buryn bastalǵan edi. Byltyr tek 24 shaqyrymy qoldanysqa berilgen. Qalǵan bóligin bıyl aıaqtaý josparda.

Aımaqta respýblıkalyq mańyzy bar 1013 shaqyrym jol bar. Sonyń 95 paıyzy asfalttalǵan. Búgingi tańda tek Kendirli-Túrikmenstanmen shekaraǵa deıingi 50 shaqyrym jolǵa asfalt tóselmegen.

— Jańaózen-Kendirli-Túrikmenstanmen shekara joly — qazir osy jobany jobalaý jumystary júrip jatyr. 179 shaqyrymnan 229 shaqyrymǵa deıin 50 shaqyrym jol. Ony jobalaý jumystary bastalyp ketti. Jobalaýdy bıyl aıaqtap, qarajat bólinse, kelesi jyly qurylysy bastalady. Al Jańaózen-Kendirli arasyndaǵy jolǵa ortasha jóndeý júrgiziledi, — deıdi «Qazavtojol» Ulttyq kompanııasy Mańǵystaý oblystyq fılıalynyń dırektory Qazbek Mámbetov.

Odan bólek, oblysta byltyr Shetpe-Jetibaı tas jolynyń 60 shaqyrymyn jóndeý jumystary bastalyp, asfalttyń tómengi qabaty tóselgen. Qalǵan jumystaryn bıyl aıaqtaý josparlanyp otyr. Osy jyly jergilikti mańyzy bar Taýshyq-Shetpe tas jolyna ortasha jóndeý jumystary júrgizilmek. Ol úshin atalǵan jol «Qazavtojol» kompanııasynyń balansyna aýystyrylmaq.

Mańǵystaýda bıyl júzege asyrylýy tıis mańyzdy jobalardyń biri — júk kólikterdiń salmaǵyn ólsheıtin avtomattandyrylǵan júıe ornatylady.

— Aýyr júk kólikteri joldarǵa kóp zaqym keltiredi. Sonyń saldarynan joldar syrylyp, jarylyp, shuńqyrǵa aınalady. Sol úshin salmaqty avtomatty túrde ólshep, aıyppul salynatyn júıe engiziledi. Ony bıylǵa josparlap otyrmyz. Shetpede qıyrshyq tas óndiriledi ǵoı, sony Aqtaýǵa nemese ary qaraı Atyraýǵa tasymaldaıdy. Sondyqtan avtomatty júıeniń bireýin Jetibaıdyń, ekinshisin Saıótestiń janyna ornatamyz, — deıdi «Qazavtojol» Ulttyq kompanııasy Mańǵystaý oblystyq fılıalynyń dırektory Qazbek Mámbetov. 

Buǵan deıin, Mańǵystaýda 25 jyldan beri asfalt tóselmegen kóshe týraly jazǵan bolatynbyz.