Mańǵystaýda Kulaly aralynan da ıtbalyqtardyń óleksesi tabyldy
AQTAÝ. KAZINFORM – Mańǵystaý oblystyq ekologııa departamenti Qulaly aralynyń jaǵalaýynan 71 ıtbalyqtyń óleksesi tabylǵanyn habarlady.
Departamenttiń zerthanalyq-taldamalyq baqylaý bóliminiń mamandary, balyq ınspektsııasy basqarmasynyń qyzmetkerleri jáne Gıdrobıologııa jáne ekologııa ınstıtýtynyń mamandary 8 qarasha kúni Kulaly aralynyń teńiz jaǵalaýynda ekologııalyq monıtorıng júrgizgen.
- Mamandar teńiz sýynan zerthanalyq taldaýlarǵa arnalǵan synamalar aldy. Taldaý nátıjeleri janýarlardyń qyrylý sebepterin anyqtaýǵa jáne osy aýdandaǵy teńiz ekojúıesiniń qazirgi jaǵdaıyn baǵalaýǵa múmkindik beredi, - delingen habarlamada.
Buǵan deıin, Mańǵystaýda Túpqaraǵan aýdany Bozashy múıisinen 112 ıtbalyqtyń óleksesi tabylǵan edi. Keıin ıtbalyqtardyń neden qyrylǵany belgili boldy.