Mańǵystaýda «Qoshqar ata» qorymy aýmaǵynda senbilik ótti
AQTAÝ. KAZINFORM - Elimizde bastaý alǵan «Taza Qazaqstan» ekologııalyq aktsııasy aıasynda Aqshuqyr eldi mekeninde ornalasqan «Qoshqar ata» qorymynda tazalyq jumystary júrgizildi, dep habarlaıdy Qoǵamdyq kommýnıkatsııa ortalyǵy.
Senbilikke M.Óskinbaev atyndaǵy Mańǵystaý oblystyq fılarmonııasy qyzmetkerleri men Q.Sydıyqov atyndaǵy Mańǵystaý oblystyq ámbebap kitaphanasynyń ujymy atsalysty.
«18 sáýir – Halyqaralyq eskertkishter men tarıhı oryndar kúnine oraı «Taza Qazaqstan» respýblıkalyq aktsııasyna óz úlesimizdi qosyp, senbilik ótkizdik. Kóktem mezgili – jańarý men jańǵyrý, kúl-qoqystan tazarý maýsymy. Tabıǵatty aıalaıyq. Óńir kelbetin kórkeıtýge árbir turǵyn atsalysýy kerek», - dedi M.Óskinbaev atyndaǵy Mańǵystaý oblystyq fılarmonııasy dırektory Danııar Saǵynǵalıuly.
Sondaı-aq, Q.Sydıyqov atyndaǵy Mańǵystaý oblystyq ámbebap kitaphanasy dırektorynyń orynbasary Yntymaq Bojanov tarıhı oryndardy kútip, saqtaýdyń mańyzy jóninde aıtty.
«Ózderińizge málim, el aýmaǵynda 25 myńnan tarıhı-mádenı eskertkish bar. Sonyń biregeıi — «Qoshqar ata» qorymyn qoqystardan tazartyp jatyrmyz. Bolashaq urpaq úshin tarıhı oryndardy kútip ustaýǵa basa mán berýimiz kerek. Kóterińki kóńil kúımen senbilikti ótkerdik. Kıeli, tarıhı-tabıǵı oryndardyń qundylyǵyn dáripteýge atsalysyp júrmiz dep oılaımyn», - dedi Yntymaq Bojanov.
Aıta óteıik, «Qoshqar ata» qorymy Aqtaý qalasynan 17 shaqyrym qashyqta, soltústik-batys baǵytta ornalasqan. Qorym jergilikti mańyzy bar tarıh jáne mádenıet eskertkishteriniń memlekettik tizimine, sondaı-aq Mańǵystaý oblysy boıynsha óńirlik mańyzy bar qasıetti nysandar tizimine engizilgen. Zertteý jumystarynyń nátıjesinde qorymnan 81 eskertkish esepke alynǵan.
