Mańǵystaýda kóne meshitti búldirgender izdestirilip jatyr
AQTAÝ. KAZINFORM — Belgisiz bireýler Túpqaraǵan aýdanynda ornalasqan Qapam ata jartasty meshitiniń bastapqy kelbetin ózgertip, plastık tereze men esik ornatyp, tarıhı-mádenı eskertkishke erekshe nuqsan keltirgen. Túpqaraǵan aýdandyq polıtsııa bólimi belgisiz tulǵany anyqtaý boıynsha jedel jumys júrgizilip jatqanyn habarlady.
Mańǵystaý memlekettik tarıhı-mádenı qoryǵynyń málimetinshe, Qapam ata jartasty meshiti — Taýshyq aýylynan 22 shaqyrym soltústik-batys baǵytta ornalasqan. Nysan jumsaq jynysty jartas qabatyn qashaý arqyly jasalyp, ashyq shóleıtti-dalaly aımaqtaǵy tik jartasty bólikte ornalasqan. «Qapam ata jartasty meshiti» tarıhı-mádenı mura obektilerin aldyn ala esepke alý tizimine engizilgen.
— Zańdylyqtardy basshylyqqa ala otyryp, tarıhı-mádenı mura obektisiniń tarıhı-mádenı mańyzdylyǵyn jáne saqtalý dárejesin anyqtaýǵa baǵyttalǵan zertteý jáne jergilikti dárejede memlekettik qorǵaýǵa alý maqsatynda 2025 jyly shilde aıynda tarıhı-mádenı saraptama jasaldy. Saraptama qortyndysyna sáıkes — tarıhı-mádenı mańyzy bary anyqtaldy. Bul kezde meshit sol qalpynda turdy. Alaıda, 2025 jyldyń jeltoqsan aıynda belgisiz bireýler bastapqy kelbetin ózgertip, tarıhı-mádenı eskertkishke erekshe nuqsan keltirgen, — delingen habarlamada.
«Tarıhı-mádenı mura obektilerin qorǵaý jáne paıdalaný týraly» zańyna sáıkes, tarıh jáne mádenıet eskertkishiniń ornyn aýystyrýǵa jáne ony ózgertýge tyıym salynady. Osy zańǵa sáıkes, qoryq mamandary Túpqaraǵan aýdany ákimdigine, sonymen qatar Túpqaraǵan aýdany polıtsııa bólimine anyqtalǵan quqyq buzýshylyq týraly hat joldaǵan. Aýdandyq polıtsııa belgisiz tulǵany anyqtaýǵa kirisken.
Qazaqstan Respýblıkasynyń Ákimshilik quqyq buzýshylyq kodeksiniń 145-babyna sáıkes, zań buzýshyǵa 10-nan 250 AEK-ke deıin (43 250-den 1 081 250 teńgege deıin) mólsherinde aıyppul qarastyrylǵan. Sondaı-aq, zańsyz qurylys sony júzege asyrǵan adamnyń esebinen buzylýǵa tıis.
Buǵan deıin, Mańǵystaýda tabıǵı nysandy búldirgen turǵyn 25 táýlikke qamalǵan edi.
